வடமராட்சி தம்பசிட்டியில் கௌரவ தர்மலிங்கம் சித்தார்த்தன் அவர்கள் தேர்தல் விளக்கவுரை-
யாழ். வடமராட்சி தம்பசிட்டி தசாவதானி கதிரவேற்பிள்ளை சனசமூக நிலையத்தில் தமிழ் தேசியக் கூட்டமைப்பின் இணைத்தலைவர்களில் ஒருவரான கௌரவ தர்மலிங்கம் சித்தார்த்தன் அவர்கள் அப் பிரதேச இளைஞர்கள் மத்தியில் தேர்தல் விளக்கவுரை ஆற்றியுள்ளார். இன்றுமாலை முதல் இந்த சந்திப்புகள் இடம்பெற்று வந்தமை குறிப்பிடத்தக்கது. மேலும் அப்பிரதேசத்திலும் வேறு இடங்களிலும் சிறு சிறு குழுக்களாக மக்கைளை சந்தித்து நிகழ்கால அரசியல் தொடர்பாக கலந்துரையாடியுள்ளார்.
நாங்கள் எவருடனும் இரகசிய ஒப்பந்தங்களை மேற்கொள்ளவில்லை. கடந்த காலங்களில், ஆளும் ஐக்கிய மக்கள் சுதந்திரக் கூட்டமைப்பு பாரிய மோசடிகளைச் செய்தது. அவை அனைத்தையும் நாம் பொறுத்துக்கொண்டோம். எமது வெற்றி உறுதி. நாம் எமது விஞ்ஞாபனத்தை முன்வைத்த பின்னரே பலர் எம்முடன் இணைந்துகொண்டனர். நாம் ஒருமைப்பாட்டைப் பாதுகாப்போம் என எதிரணியின் பொது வேட்பாளர் மைத்திரிபால சிறிசேன தெரிவித்துள்ளார். திம்பிரிகஸ்யாய பிரதேசத்தில்இடம்பெற்ற விசேட கூட்டமொன்றின்போதே அவர் மேற்கண்டவாறு கூறியுள்ளார். அங்கு தொடர்ந்து உரையாற்றிய அவர், இந்த நாட்டை பிளக்கவும் புலிகள் மீண்டும் தலைதூக்கவும் ஒருபோதும் இடமளிக்க மாட்டோம். எதிர்வரும் மூன்று நாட்களில் கடுமையான தேர்தல் வன்முறைகளில் ஈடுபட ஆளுந்தரப்பு முயற்சித்து வருகின்றது. நாம் சமாதானமானதும் நீதியானதுமான தேர்தலை எதிர்பார்க்கிறோம். பாரிய வெற்றியுடன் நாம் புதிய யுகத்தைப் படைப்போம் என குறிப்பிட்டுள்ளார்.
இரத்தினபுரி கஹாவத்தை நகரில் இன்று அதிகாலை இடம்பெற்ற துப்பாக்கி பிரயோக சம்பவத்துடன் தொடர்புடைய நான்கு பேர் இனங்காணப்பட்டுள்ளதாக தெரிவிக்கப்படுகிறது. காவல்துறை ஊடக பேச்சாளர் அஜித் ரோஹண இதனை தெரிவித்துள்ளார். பொது வேட்பாளர் மைத்திரிபால சிறிசேன தலைமையில் கஹாவத்தையில் இன்று பொதுக்கூட்டம் இடம்பெறவிருந்தது இந்நிலையில், இதற்கான ஏற்பாடு பணிகளில் ஈடுபட்டிருந்தவர்கள் மீது இன்று அதிகாலை துப்பாக்கி பிரயோகம் மேற்கொள்ளப்பட்டது. இதன்போது மூன்று பேர் காயமடைந்த நிலையில் அவர்கள் தற்போது இரத்தினபுரி மருத்துவமனையில் சிகிச்சை பெற்று வருகின்றனர். இவர்களில் ஒருவரின் நிலைமை கவலைக்கிடமாக இருப்பதாக காவல்துறை ஊடக பேச்சாளர் குறிப்பிட்டுள்ளார். இதனிடையே, பொலன்னறுவையில் நேற்றையதினம் ஜனாதிபதி மகிந்த ராஜபக்ஸவின் தலைமையில் இடம்பெற்ற பிரசார கூட்டத்தில் பங்குகொண்டு திரும்பிய மூன்று பேரூந்துகள்மீது நேற்று இரவு தாக்குதல் மேற்கொள்ளப்பட்டுள்ளது. இதன்போது மூன்று பேர் காயங்களுக்கு உள்ளாகியதாகவும் காவல்துறை பேச்சாளர் சுட்டிக்காட்டியுள்ளார்.
ஜனாதிபதி தேர்தலுக்கான உத்தியோகபூர்வ வாக்காளர் அட்டை விநியோக நடவடிக்கை 94 வீதம் நிறைவுபெற்றுள்ளதாக தபால் திணைக்களம் குறிப்பிட்டுள்ளது. உத்தியோகபூர்வ வாக்காளர் அட்டைகளில் 6 வீதமானவற்றை விநியோகிக்க முடியாத நிலை காணப்படுவதாக தபால் மாஅதிபர் ரோஹண அபேரத்ன தெரிவித்துள்ளார். உத்தியோகபூர்வ வாக்காளர் அட்டைகளை வீடுகளுக்கு விநியோகிக்கும் காலஅவகாசம் நேற்றுடன் நிறைவுபெற்றுள்ளளது. வாக்காளர் அட்டைகள் கிடைக்காதவர்கள் தமது அடையாளத்தை உறுதிப்படுத்தி உரிய தபாலகங்களில் அவற்றை பெற்றுக்கொள்ள முடியும் என தபால் மாஅதிபர் குறிப்பிட்டுள்ளார். இதேவேளை ஜனாதிபதித் தேர்தல் தொடர்பில் இதுவரை 1185 முறைப்பாடுகள் பதிவாகியுள்ளதென தேர்தல் திணைக்களம் தெரிவித்துள்ளது. 142 முறைப்பாடுகள் வன்முறைகளுடன் தொடர்புபட்டதென தெரிவிக்கப்பட்டுள்ளது. தேர்தல் சட்டமீறல்கள் குறித்து 1043 முறைப்பாடுகள் கிடைக்கப்பெற்றுள்ளதென தேர்தல் திணைக்களம் கூறியுள்ளது.
தமிழ் தேசிய கூட்டமைப்பும், சிறிலங்கா முஸ்லிம் காங்கிரஸ{ம் ஏனைய சிங்கள அரசியல் கட்சிகளும், பொது இலக்குடனேயே ஒன்றிணைந்திருப்பதாக எதிர்க்கட்சிகளின் பொது வேட்பாளர் மைத்திரிபால சிறிசேன தெரிவித்துள்ளார். அரலகங்கவிலயில் இடம்பெற்ற மக்கள் சந்திப்பில் வைத்து அவர் இதனைக் கூறியுள்ளார். தமிழ் தேசியக் கூட்டமைப்புடனும், முஸ்லிம் காங்கிரஸ{டனும் தாம் இரகசிய உடன்படிக்கைகளை ஏற்படுத்திக் கொண்டிருப்பதாக குற்றம் சுமத்தப்படுகிறது. ஆனால் அவ்வாறான எந்த உடன்படிக்கையும் ஏற்படுத்திக் கொள்ளவும் இல்லை. புதிதாக ஏற்படுத்திக் கொள்வதாகவும் இல்லை. ஆட்சி மாற்றத்தை ஏற்படுத்தும் பொது இலக்குடன் அனைத்து தரப்பும் ஒன்றிணைந்திருப்பதாக அவர் மேலும் குறிப்பிட்டுள்ளார்.
வன்முறைகளில் ஈடுபடும் யாரையும் பொதுமக்கள் இந்தத் தேர்தலில் ஆதரிக்க மாட்டார்கள் என்றும் அமைச்சர் வாசுதேவ நாணயக்கார வலியுறுத்தி கூறியுள்ளார். அரசாங்கத்தின் வீழ்ச்சிக்கு அடாவடி செயற்பாடுகள் கொண்ட பொதுபல சேனா அமைப்பினரே காரணம் என அமைச்சர் வாசுதேவ நாணயக்கார ஊடகத்திற்கு கருத்துத் தெரிவித்துள்ளார். பொதுபல சேனா அமைப்பு தமிழ், முஸ்லிம்களை கருவறுக்கும் நோக்குடன் உருவாக்கப்பட்டிருப்பதாகவும் அவர் குற்றம் சாட்டியுள்ளார். அவ்வாறான ஒரு அமைப்பு ஜனாதிபதித் தேர்தலின்போது மஹிந்த ராஜபக்சவுக்கு ஆதரவு வழங்க முன்வந்ததையடுத்து, அரசாங்கத்தின் சிறுபான்மை மக்கள் மத்தியில் இருந்த அரசாங்கத்தின் ஆதரவுத் தளம் முற்றாக சிதைந்து போயுள்ளது. மேலும் வன்முறைகளுக்கு ஆதரவளிக்கும், வன்முறைகளில் ஈடுபடும் யாரையும் பொதுமக்கள் இந்தத் தேர்தலில் ஆதரிக்க மாட்டார்கள் என்றும் அமைச்சர் வாசுதேவ நாணயக்கார வலியுறுத்தி கூறியுள்ளார்.
நடைபெறவுள்ள ஜனாதிபதி தேர்தலில் தமிழ் தேசிய கூட்டமைப்பு மைத்திரிபாலவிற்கு ஆதரவு வழங்குவதாக தெரிவித்தமைக்காக, தான் இந்த தேர்தலை புறக்கணிப்பதாக வடமாகாண சபை உறுப்பினர் அனந்தி சசிகரன் தெரிவித்துள்ளார். யாழ். ஊடக அமையத்தில் நடைபெற்ற ஊடகவியலாளர்கள் சந்திப்பின் போதே அவர் இவ்வாறு குறிப்பிட்டுள்ளார். இறுதி யுத்தத்தின்போது, பாதுகாப்பு அமைச்சின் பிரதி அமைச்சராக மைத்திரி இருந்துள்ளார். அப்போது, முள்ளிவாய்க்கால் யுத்தத்தில் தமிழ் மக்களை கொல்லும்போது எந்த கருத்துக்களையும் கூறவில்லை. அந்த அடிப்படையில், மக்களிடம் சென்று இவருக்கு வாக்களிக்குமாறு கேட்க முடியாது. அத்துடன், யுத்தம் நிறைவடைந்த பின்னர் நடைபெற்ற ஜனாதிபதி தேர்தலில் முன்னாள் இராணுவத் தளபதி சரத் பொன்சேகா போட்டியிடுவதற்கு ஆதரவு தெரிவித்தனர். ஆனால், சரத் பொன்சேகா தோல்வியடைந்தார். தமிழ் தேசிய கூட்டமைப்பினரின் இந்த செயற்பாட்டினை நான் முற்றாக நிராகரிப்பதுடன், இந்த தேர்தலிற்கு மக்களை வாக்களிக்குமாறு கேட்க முடியாது என்று மாகாணசபை உறுப்பினர் அனந்தி சசிதரன் மேலும் குறிப்பிட்டுள்ளார்.
அரலகங்வில பகுதியில் இடம்பெற்றுவரும் தேர்தல் வன்முறைகளை கட்டுப்பாட்டிற்குள் கொண்டு வருவதற்காக விசேட அதிரடி படையினர் கடமைகளில் ஈடுபடுத்தப்பட்டுள்ளதாக பொலிஸார் கூறுகின்றனர் அரலகங்வில மற்றும் அதனை அண்மித்த பகுதிகளில் நேற்று 5 வன்முறை சம்பவங்கள் பதிவாகியுள்ளதாக பொலிஸ் ஊடகப் பேச்சாளரும் சிரேஷ்ட பொலிஸ் அத்தியட்சகருமான அஜித் ரோஹண தெரிவித்துள்ளார். புதிய ஜனநாயக முன்னணியின் ஜனாதிபதி வேட்பாளர் மைத்திரிபாலவின் தேர்தல் பிரசார கூட்டம் நிறைவுபெற்ற பின்னர், குறித்த இடத்தில் துப்பாக்கி பிரயோகமொன்று மேற்கொள்ளப்பட்டுள்ளதாக அவர் கூறியுள்ளார். எனினும், இந்த துப்பாக்கி பிரயோகத்தில் எவருக்கும் காயங்கள் ஏற்பட்டமை குறித்து தமக்கு இதுவரை தகவல் எதுவும் கிடைக்கவில்லை என அவர் குறிப்பிட்டுள்ளார். மேலும் அரலகங்வில பகுதியை அண்மித்து, சிறு அளவிலான மேலும் நான்கு வன்முறை சம்பவங்கள் பதிவாகியுள்ளன.
சமூகநீதிக்கான பல்கலைக்கழக ஆசிரியர்கள் மற்றும் யாழ். பல்கலைக்கழக ஆசிரியர் சங்கத்தினர் எதிரணியின் பொது வேட்பாளர் மைத்திரிபால சிறிசேனவுக்கே தமது ஆதரவை வழங்குவதாக தெரிவித்துள்ளனர். யாழ்ப்பாணத்தில் நேற்று நடைபெற்ற ஊடகவியலாளர் சந்திப்பில் பல்கலைக்கழக ஆசிரியர் சங்கத்தின் தலைவர் அ.இராசகுமாரன் தமது ஆதரவு அறிவித்தலை விடுத்துள்ளமை இங்கு குறிப்பிடத்தக்கது. இதேவேளை தேசிய காங்கிரசின் கிழக்கு மாகாணசபை உறுப்பினர் ஆரிப் சம்சுதீன், எதிர்வரும் ஜனாதிபதி தேர்தலில் எதிரணியின் பொது வேட்பாளர் மைத்திரிபால சிறிசேனவுக்கு ஆதரவு தெரிவித்து பொது எதிரணியுடன் இணைந்துகொண்டுள்ளார். பொலன்னறுவை தம்பாலை இடம்பெற்ற தேர்தல் பிரசார கூட்டத்தில் வைத்தே அவர் தனது ஆதரவை மைத்திரிபால சிறிசேனவுக்கு வழங்குவதாக கூறியுள்ளார்.
மட்டக்களப்பு, காத்தான்குடியில் கிழக்கு மாகாண சபை உறுப்பினர் சிப்லி பாறூக்கின் வீடு உட்பட நான்கு பேரின் வீடுகளுக்கு இன்று அதிகாலை கைக்குண்டு வீச்சுத் தாக்குதல் மேற்கொள்ளப்பட்டுள்ளதாக காத்தான்குடி பொலிஸார் தெரிவித்துள்ளனர். பொது எதிரணியின் வேட்பாளர் மைத்திரிபால சேறிசேனவை ஆதரித்துவரும் அகில இலங்கை மக்கள் காங்கிரஸ் கட்சியின் கிழக்கு மாகாண சபை உறுப்பினரான, பொறியியலாளர் சிப்லி பாறூக்கின் வீட்டின் மீதும் அவரது ஆதரவாளரான புதிய காத்தான்குடி 02ஆம் குறுக்குத் தெருவிலுள்ள எம்.ஐ.எம்.முஜீப் என்பவரின் வீட்டின்மீதும் காத்தான்குடி 06ஆம் குறிச்சி தாறுஸ்ஸலாம் வீதியிலுள்ள ஏ.எல்.இஸ்ஹாக் என்பவரின் வீட்டின்மீதும் காத்தான்குடி அல்.அமீன் வீதியில் அமைந்துள்ள எம். பஷீர் என்வரின் வீட்டின்மீதுமே மேற்படி கைக்குண்டுகள் வீசப்பட்டுள்ளன. இதன் காரணமாக வீட்டின் முன் இருந்த கதிரைகள் சேதமடைந்துள்ளன. இது தொடர்பாக விசாரணைகளை மேற்கொண்டு வருவதாக காத்தான்குடி பொலிஸார் தெரிவித்துள்ளனர்.
புலிகள் அமைப்பிற்கு எதிரான தடையை தமிழக அரசாங்கம் நீடித்துள்ளது. தமிழக அரசின் பொதுத்துறை தலைமை செயலாளர் ஜிதேந்திரநாத் ஸ்வைன் விடுத்துள்ள அறிக்கையில் இந்த விடயம் தெரிவிக்கப்பட்டுள்ளது. கடந்த ஆண்டு முன்னாள் அமைச்சர் பி.சிதம்பரத்தின் வீட்டுக்கு முன்னாள் குண்டுத் தாக்குதல் ஒன்று மேற்கொள்ளப்பட்டிருந்ததுடன் அவரது வீட்டுக்கு முன்னாள் ஆர்ப்பாட்டம் ஒன்றும் நடத்தப்பட்டிருந்தது. அத்துடன் ஜனதா கட்சியின் தலைவர் சுப்ரமணியம் சுவாமியின் வேனில் பொருத்தப்பட்டிருந்த குண்டு ஒன்றும் மீட்கப்பட்டிருந்தது. இவற்றை புலிகளே மேற்கொண்டதாக தமிழக அரசாங்கம் குற்றம் சுமத்தியுள்ளது. அத்துடன் கடந்த வருடம் புலிகள் இயக்கத்தின் தலைவர் வேலுப்பிள்ளை பிரபாகரனின் பிறந்த தினம் மற்றும் மாவீரர் தினம் என்பவை தமிழகத்தில் உள்ள அகதி முகாம்களில் அனுஸ்டிக்கப்பட்டிருந்தன. இவ் விடயங்கள் புலிகள் அமைப்பு தமிழகத்தில் தொடர்ந்தும் இயங்குகின்றது என்பதை உறுதிபடுத்தியிருக்கிறது. இந்நிலையில் தமிழக அரசாங்கத்தில் உருவாக்கப்பட்ட சட்டவிரோத செயற்பாடுகளை தடுப்பதற்கான தீர்ப்பாயத்தின் உத்தரவின்படி, புலிகள் மீதான தடையும் நீடிக்கப்படுகின்றது என ஜிதேந்திரநாத் ஸ்வைன் விடுத்துள்ள அந்த அறிக்கையில் மேலும் தெரிவிக்கப்பட்டுள்ளது.
இலங்கையில் ஏற்பட்ட கால நிலை மாற்றத்தின் எதிரொலியால் பாதிக்கப்பட்ட வட கிழக்கு உறவுகளுக்கு புலம்பெயர் கருணை உள்ளங்கள் உள்ளூரில் இருக்கும் கொடையாளிகளின் உதவிகளை வவுனியா கோயில்குளம் இளைஞர் கழகத்தின் இடர் முகாமத்துவப்பிரிவு நாடியுள்ளது. 
யாழ். காங்கேசன்துறையிலிருந்து உத்தியோகபூர்வமாக யாழ்ப்பாணம் ஊடாக கொழும்புக்கு செல்லும் யாழ்தேவி ரயில் சேவையை ஆரம்பித்து வைக்கும் நிகழ்வு இன்றையதினம் இடம்பெற்றுள்ளது. மேற்படி நிகழ்வில் ஜனாதிபதி மஹிந்த ராஜபக்ஷ கலந்துகொள்ளவில்லை. ஐக்கிய மக்கள் சுதந்திரக் கூட்டமைப்பின் செயலாளரும் அமைச்சருமான சுசில் பிரேமஜயந்த, போக்குவரத்து அமைச்சர் குமார வெல்கம ஆகியோர் இந்த ரயில் சேவையை உத்தியோகபூர்வமாக ஆரம்பித்து, காங்கேசன்துறையிலிருந்து யாழ்ப்பாணம் வரை பயணித்துள்ளனர். அமைச்சர் கே.என்.டக்ளஸ் தேவானந்தா, வடமாகாண ஆளுநர் ஜீ.ஏ.சந்திரசிறி ஆகியோரும் இவர்களுடன் ரயிலில் பயணம் செய்துள்ளனர். 1990ஆம் ஆண்டு ஏப்ரல் 19ஆம் திகதியுடன் காங்கேசன்துறையிலிருந்து கொழும்புக்கு இறுதியாக ரயில் சேவை இடம்பெற்று பின்னர் நாட்டில் இடம்பெற்ற யுத்தத்தால் ரயில் சேவை அஸ்தமித்திருந்தது. மீண்டும் 24 வருடங்களில் பின்னர் ரயில் சேவை தற்போது ஆரம்பிக்கப்பட்டுள்ளமை குறிப்பிடத்தக்கது.
பழிவாங்கும் அரசியல் தம்மிடமில்லை எனவும், ராஜபக்ச குடும்பத்தினரே வைராக்கிய அரசியலை முன்னெடுப்பதாகவும் சாடியுள்ள முன்னாள் ஜனாதிபதி சந்திரிகா பண்டாரநாயக்க குமாரதுங்க, நாட்டு மக்களை பழிவாங்கும் ராஜபக்சவிடமிருந்து நாட்டைப் பாதுகாக்கவே தாம் முனைவதாகவும் குறிப்பிட்டுள்ளார். மாத்த்தளை மாவட்ட எம்.பியும் பிரதியமைச்சருமான நந்திமித்ர ஏக்கநாயக்க எதிரணியுடன் இணைந்துகொள்ளும் செய்தியாளர் மாநாடு அவரது இல்லத்தில் நடைபெற்றநிலையில் அங்கு உரையாற்றும்போதே சந்திரிகா குமாரதுங்க இவ்வாறு உரையாற்றியுள்ளார். எம்மிடம் ஒருபோதும் அரசியல் பழிவாங்கல் இருந்ததில்லை. நாம் அவ்வாறு செயற்படப் போவதுமில்லை. எனது ஆட்சிக்காலத்தல் கட்சி சார்ந்த அரசு ஊழியர்களை இடமாற்றம் செய்ய நான் ஒருபோதும் அனுமதி வழங்கவில்லை என அவர் மேலும் கூறியுள்ளார்.
முன்னாள் பிரதி அமைச்சரும், ஜனாதிபதியின் ஆலோசகருமான வீ.புத்திரசிகாமணியும் எதிரணி பொது வேட்பாளர் மைத்திரிபால சிறிசேனவுக்கு ஆதரவளிப்பதாக இன்று அறிவித்துள்ளார். அத்துடன் ஹிரியால மற்றும் குருனாகலை பிரதேச சபைகளின் உறுப்பினர்கள் 3பேரும் பொது வேட்பாளருக்கு ஆதரவளிப்பதாக அறிவித்துள்ளனர். மற்றும் அம்பலாங்கொட பிரதேச சபையின் சுயாதீன உறுப்பினர் பீ.பி.லக்சரு எதிரணி பொது வேட்பாளர் மைத்திரிபால சிறிசேனவிற்கு ஆதரவு அளிப்பதாக அறிவித்துள்ளார். காலி பொது வேட்பாளர் அலுவலகத்திற்கு இன்று காலை சென்ற அவர் அங்கு நடைபெற்ற ஊடகவியலாளர் சந்திப்பில் தனது ஆதரவை மைத்திரிபால சிறிசேனவிற்கு அவர் வெளியிட்டுள்ளார். அம்பலாங்கொட பிரதேச சபைக்கு சுயேட்சை குழு மூலம் தெரிவான அவர் ஐக்கிய மக்கள் சுதந்திர முன்னணிக்கு ஆதரவு வழங்கி வந்தார்.
பல்கலைக்கழகம் செல்லும் எவரிடமும் கட்டண அறவீடுகளை தாம் மேற்கொள்ளப்போவதில்லை என எதிரணி பொது வேட்பாளர் மைத்திரிபால சிறிசேன தெரிவித்துள்ளார். அரசாங்கம் இது தொடர்பில் பொய்யான பிரசாரத்தை மேற்கொண்டு வருவதாகவும் அவர் குறிப்பிட்டுள்ளார். தற்போதையை நிலைமையின்படி பல்கலைக்கழக மாணவர்களுக்கு வழங்கப்படும் மடிகணனிக்கு அவர்கள் கல்வியை முடித்த பின்னர் கட்டணங்களை செலுத்த வேண்டியுள்ளது. இது தமது ஆட்சியின் போது முழுமையாக அகற்றப்படும் என அவர் கூறியுள்ளார். அத்துடன் தமது 49 வருடகால அரசியல் வாழ்க்கையில் வெற்றி மற்றும் தோல்வி ஆகிய இரண்டையும் பார்த்துள்ளதாகவும், தற்போது ஏற்பட்டுள்ளதை போன்று, அரசாங்கத்துக்கு மக்கள் மத்தியில் அதிருப்தி ஏற்பட்டுள்ள தேர்தலை தாம் பார்த்ததில்லை என்றும் அவர் சுட்டிக்காட்டியுள்ளார்.
ஐக்கிய தேசியக் கட்சியின் பெலியத்த தொகுதி அமைப்பாளர் விமல் ஜயசிறியின் பெலியத்த – கஹவத்த வீட்டின்மீது நேற்று இரவு தாக்குதல் நடத்தப்பட்டுள்ளது. 15 மோட்டார் சைக்கிள்களில் சென்ற ஆயுதம் தாங்கிய குழுவினர் வீட்டின்மீது தாக்குதல் நடத்தியதுடன் மைத்திரிபால சிறிசேனவின் புகைப்படம், ஆவணங்களையும் சேதப்படுத்தியுள்ளனர். தாக்குதலில் விமல் ஜயசிறியின் மனைவி பிரியங்கா கருணாதிலகவிற்கு காயம் ஏற்பட்டுள்ளது. நான்கு மோட்டார் சைக்கிள் மற்றும் கார் ஒன்றுக்கு சேதம் ஏற்படுத்திய குழு துப்பாக்கிச்சூடும் நடத்திவிட்டு தப்பிச் சென்றுள்ளது. பெலியத்த பொலிஸார் இது குறித்து விசாரணைகளை மேற்கொண்டுள்ளனர்.
சந்தாதாரர்களின் சம்மதமின்றி அலைபேசி வலையமைப்புகளூடாக தேர்தல் பிரசாரம் செய்வதை தவிர்க்குமாறு சகல வேட்பாளர்களிடமும் தேர்தல்கள் ஆணையாளர் மஹிந்த தேசப்பிரிய கேட்டுக்கொண்டுள்ளார். வாக்களிப்புக்கு 48மணிநேரத்துக்கு முன்னளர் செய்யப்படும் இவ்வாறான பிரசாரங்கள் தேர்தல் சட்டங்களை மீறியதாக கொள்ளப்படும் என்றும் அவர் கூறியுள்ளார். அரசியல் கட்சிகளையும் வேட்பாளர்களையும் ஆதரிக்கும் குறுஞ்செய்திகளை அனுப்பும் திட்டமிட்ட செயற்பாடுகள் பற்றி முறைப்பாடுகள் கிடைத்துள்ளதாக அவர் குறிப்பிட்டுள்ளார்.
