பசுபிக் பெருங்கடலில் உள்ள குட்டி நாடான பப்புவா நியூ கினியாவில் உள்ள இரண்டாவது மிகப்பெரிய நகரமான ´லே´-யில் இருக்கும் புய்மோ சிறையில் கொலை, கொள்ளை, வழிப்பறி, திருட்டு போன்ற குற்றங்களில் தண்டிக்கப்பட்ட கைதிகள் அடைக்கப்பட்டுள்ளனர்.

இந்த நிலையில், இரவில் கைதிகளில் ஒரு பிரிவினர் சிறையின் சுற்றுச்சுவரை உடைத்து தப்பி ஓடினர்.இதனால், பாதுகாப்பு பணியிலிருந்த பொலிசார் தப்பியோடிய கைதிகள் மீது துப்பாக்கிச் சூடு நடத்தினர். இதில் சுமார் 17 கைதிகள் கொல்லப்பட்டனர்.

சிறைக்கு அருகிலுள்ள பகுதிகளில் பொலிசார் நடத்திய தேடுதல் வேட்டையின் போது பதுங்கியிருந்த 57 கைதிகள் கைது செய்யப்பட்டு மீண்டும் சிறையிலடைக்கப்பட்டனர்.

கடந்தாண்டு இதே சிறையில் கைதிகள் தப்பியோடிய போது பொலிசார் நடத்திய துப்பாக்கிச் சூட்டில் 12 கைதிகள் சுட்டுக் கொல்லப்பட்டனர் என்பது குறிப்பிடத்தக்கது.