இரத்ததானம் வழங்கல் மற்றும் கற்றல் உபகரணங்கள் வழங்கிவைப்பு- (Photos)⇓
எமது கட்சியின் ஆதரவாளரான திரு. இ.தயாபரன் அவர்களின் 50ஆவது பிறந்தநதினத்தை முன்னிட்டு இரத்ததானம் வழங்கும் நிகழ்வும், கருவி என்றழைக்கப்படும் மாற்றுத்திறனாளிகளின் சமூகவள நிலயைத்திற்கு கற்றல் உபகரணங்களை வழங்கிவைக்கும் நிகழ்வும் நேற்று முன்தினம் (10.01.2015) சனிக்கிழமை யாழ். கோண்டாவிலில் இடம்பெற்றது. இதன்போது 53பேர் இரத்ததானம் வழங்கியிருந்தனர். அத்துடன் கருவி என்னும் மாற்றுத்திறனாளிகளின் சமூகவள நிலையத்தினருக்கு ஒரு தொகுதி கற்றல் உபகரணங்கள் புளொட் தலைவரும் முன்னாள் பாராளுமன்ற உறுப்பினரும், வட மாகாணசபை உறுப்பினருமாகிய திரு. தர்மலிங்கம் சித்தார்தத்தன் அவர்களால் வழங்கிவைக்கப்பட்டது. மேலும் கோண்டாவில் இந்துக்கல்லூரியில் பயிலும் வறுமைக் கோட்டின்கீழ் உள்ள குடும்பங்களைச் சேர்ந்த மாணவர்களுக்கு கற்றல் உபகரணங்களும், இணுவில் லயன்ஸ் கழகத்தினருக்கு 10,000 ரூபாய் பணமும் வழங்கிவைக்கப்பட்டது. Read more
தமிழ் பேசும் மக்கள் மீண்டும் ஒருமுறை இலங்கை நாட்டில் ஐக்கியத்துடன் வாழ்வதற்கான விருப்பத்தை தமது அமோக ஆதரவை வாக்களிப்பின் மூலம் வெளிப்படுத்தி நாட்டின் தலைவராக மைத்திரிபால சிறிசேனாவை வெற்றிகொள்ள வைத்துள்ளார்கள்.
புதிய பிரதமர் ரணில் விக்ரமசிங்கவின் செயலாளராக, இலங்கை நிர்வாக சேவை அதிகாரி சமன் ஏக்கநாயக்க நியமிக்கப்பட்டுள்ளார். மைத்திரிபால சிறிசேன இந் நாட்டின் புதிய ஜனாதிபதியாக தெரிவு செய்யப்பட்டதை அடுத்து அவரது பாராளுமன்ற உறுப்பினர் வெற்றிடத்துக்கு பொலனறுவை மாவட்ட ஐ.ம.சு. முன்னணி பட்டியலில் அடுத்ததாக அதிக வாக்குகளைப் பெற்ற ஜயசிங்க பண்டார நியமிக்கப்படவுள்ளார். இவர் எதிர்வரும் 19 ஆம் திகதி பாராளுமன்றம் கூடும்போது சத்தியப்பிரமானம் செய்து பதவியேற்றுக்கொள்வார். பதவி நீக்கம் செய்யப்பட்ட முன்னாள் பிரதம நீதியரசர் ஷிராணி பண்டாரநாயக்கவை மீண்டும் பிரதம நீதியரசராக நியமிப்பதற்கு ஜனாதிபதி மைத்திரிபால சிறிசேன தலைமையிலான அரசாங்கம் தீர்மானம் எடுத்துள்ளது. தான் ஜனாதிபதியாக தெரிவு செய்யப்பட்டால் முன்னாள் ஜனாதிபதி மஹிந்த ராஜபக்ஷ ஆட்சியில் பதவி நீக்கம் செய்யப்பட்ட முன்னாள் பிரதம நீதியரசர் ஷிராணி பண்டார நாயக்கவை மீண்டும் பிரதம நீதியரசராக நியமிப்பேன் என மைத்திரிபாலவின் 100 நாள் வேலைத்திட்டத்தில் தெரிவிக்கப்பட்டிருந்தது. இந்நிலையில் எதிரணியின் கட்சித் தலைவர்களுக்கு இடையில் இடம்பெற்ற கலந்துரையாடலின் போதே இந்த தீர்மானம் எடுக்கப்பட்டுள்ளது.
ஜனாதிபதி தேர்தலில் போட்டியிட்ட 17வேட்பாளர்களின் கட்டுப்பணம் அரசுடமையாக்கப்பட்டுள்ளது. குறித்த வேட்பாளர்கள் ஜனாதிபதி தேர்தலில் 1 சதவீதத்துக்கும் அதிகமான வாக்குகளைப் பெற்றுக்கொள்ளத் தவறிய நிலையிலேயே இந்நடவடிக்கை எடுக்கப்பட்டுள்ளது. இதன்படி சுயாதீன வேட்பாளர்கள் இருவரினதும், 15 அரசியல் கட்சிகளின் வேட்பாளர்களதும் கட்டுப் பணம் அரசுடமையாக்கப்பட்டுள்ளது. மேலதிக தேர்தல் ஆணையாளர் யு.அமரதாச இதனைத் தெரிவித்துள்ளார். சுயாதீன வேட்பாளர்கள் தலா 75 ஆயிரம் ரூபாவும், அங்கீகரிக்கப்பட்ட அரசியல் கட்சிகளின் வேட்பாளர்கள் தலா 50 ஆயிரம் ரூபாய் கட்டுப்பணமாக செலுத்தி இருந்தனர். இதன்படி அவர்களால் செலுத்தப்பட்ட 9 லட்சம் ரூபாய் கட்டுப்பணம் தற்போது அரசுடமையாக்கப்பட்டுள்ளது. இதேவேளை கடந்த அரசாங்கம், நடந்துமுடிந்த ஜனாதிபதித் தேர்தலின்போது அதிகாரத்தையும், அரச சொத்துக்களையும் பயன்படுத்திய விதம் குறித்து விசாரணை நடத்தவிருப்பதாக நாடாளுமன்ற உறுப்பினர் மங்கள சமரவீர தெரிவித்துள்ளார். ஆட்சியை தக்கவைத்துக் கொள்வதற்காக முன்னாள் ஜனாதிபதி மகிந்த ராஜபக்ஷவின் அரசாங்கம் அதிகார பலம், அரசாங்க சொத்துக்கள், காவற்துறை பலம் என அனைத்தையும் கட்டுப்பாடுகளின்றி பயன்படுத்தியுள்ளது. இது குறித்து விசாரணை நடத்தி நடவடிக்கை எடுக்கப்படும் என்று நாடாளுமன்ற உறுப்பினர் மங்கள சமரவீர மேலும் கூறியுள்ளார்.
தேசிய அரசு ஒன்றை அமைப்பதற்கு அனைத்து கட்சிகளும் ஒன்றிணைய வேண்டும் என ஜனாதிபதி மைத்திரிபால சிறிசேன அழைப்பு விடுத்துள்ளார். இன்று பிற்பகல் 2.30மணிக்கு கண்டி எண்கோண மண்டபத்திலிருந்து அவர் நாட்டு மக்களுக்கு உரையாற்றும்போதே இதனைக் கூறியுள்ளார். அங்கு அவர் தொடர்ந்து உரையாற்றுகையில், நாட்டின் ஜனாதிபதியாக என்னை தெரிவு செய்த அனைத்து மக்களுக்கும் முதலில் எனது நன்றியை தெரிவித்து கொள்கின்றேன். இந்த நாட்டிலிருக்கின்ற அனைவரும் இந்துக்கள், முஸ்லிம்கள் மற்றும் பௌத்தர்கள் என்ற இனமத பேதங்கள் பாராது அனைத்து மக்களும் ஒன்றிணைந்து சகோதரத்துவமாக இந்த நாட்டில் வாழ வேண்டும். எமது நாட்டைப் பொறுத்த வரையில் பொருளாதாரத்தை அதிகமாக ஈட்டித் தரும் துறையாக விவசாயம் காணப்படுகிறது. எனவே எனது நூறுநாள் வேலைத்திட்டத்தில் விவசாயத்தை மேம்படுத்துவதற்காக நவீன தொழில்நுட்ப வசதிகள் செய்து கொடுக்கப்படும். அத்துடன் சாதாரண மக்களின் வறுமையை ஒழிக்க நடவடிக்கை எடுக்கப்படும். நாட்டில் பக்கச்சார்பற்ற பொலிஸ் திணைக்களத்தை உருவாக்குவதன் மூலம் சட்ட ஒழுங்கை நிலை நாட்டி இலஞ்சம், ஊழல் மற்றும் தேவையற்ற செயற்பாடுகள் இல்லாது நாட்டை சமாதான பாதைக்கு இட்டுச் செல்ல வேண்டும். அதற்கான நடவடிக்கையில் எமது அரசு ஈடுபடும். சர்வதேசத்திலும், தேசிய ரீதியிலும் இணக்கப்பாட்டை கட்டி எழுப்பி நல்லுறவை பேணுவது எமது தலையாய கடமையாகும் எனவே நாட்டு மக்கள் அனைவரும் மனிதாபிமானத்துடனும் சகோதரத்துடனும் ஒன்றிணைந்து தேசிய அரசினை உருவாக்குவதற்கு அனைத்து கட்சிகளும் எம்முடன் ஒன்றிணைய வேண்டும். எனது முதலாவதும் இறுதியுமான தேர்தல் இது. இந்த தேசத்திற்கு தேவையானவர் அரசன் அல்ல மாறாக நல்ல ஒரு மனிதனே என குறிப்பிட்டுள்ளார். ஜனாதிபதி மைத்திரிபால சிறிசேன மற்றும் பிரதமர் ரணில் விக்ரமசிங்க ஆகியோர் இன்று கண்டி மல்வத்து மற்றும் அஸ்கெரிய மஹாநாயக்கர்களை சந்தித்தனர். கொழும்பு சுதந்திர சதுக்கத்தில் உள்ள டி.எஸ்.சேனாநாயக்கவின் சிலைக்கு மலரஞ்சலி செலுத்தியதன் பின்னர் அவர்கள் இந்த விஜயத்தை மேற்கொண்டனர். இடையில் ஹொரகொல்லயில் உள்ள பண்டாரநாயக்க சமாதிக்கு அஞ்சலி செலுத்தினர். பின்னர் தலதா மாளிகையில் மத ஆராதனையில் ஈடுபட்டத்தின் பின்னர் மாஹா நாயக்கர்களை சந்தித்து பேச்சுவார்த்தை நடத்தியுள்ளமை இங்கு குறிப்பிடத்தக்கது.
1974ம் ஆண்டு தைமாதம் 10ம் திகதி யாழ்.முற்றவெளி பகுதியில் அமைந்துள்ள வீரசிங்கம் மண்டபத்திற்கு முன்பாக நடைபெற்றுக் கொண்டிருந்த 04வது உலக தமிழாராய்ச்சி மாநாட்டின் இறுதி நாளன்று ஒன்பது தமிழ்மக்கள் படுகொலை செய்யப்பட்ட 41வது சிரார்த்ததினம் இன்றாகும். 41வது சிரார்த்த தினமான இன்றும் இத்துயர சம்பவம் நினைவு கூரப்பட்டுள்ளது. யாழ் முற்றவெளியில் அமைந்துள்ள நினைவுத்தூபியில் இன்றுகாலை மலராஞ்சலி செலுத்தப்பட்டு மௌனஅஞ்சலியும் இடம்பெற்றது. அஞ்சலி நிகழ்வில் எழுத்தாளரும், பதிப்பாளரும், கல்விமானுமாகிய மறவன்புலவு க.சச்சிதானந்தம் ஐயா அவர்களும், தமிழ் தேசியக் கூட்டமைப்பின் நாடாளுமன்ற உறுப்பினர்கள் மாவை சேனாதிராசா, சுரேஸ் பிரேமச்சந்திரன், வடமாகாண சபை உறுப்பினர்கள் தர்மலிங்கம் சித்தார்த்தன், கனகலிங்கம் சிவாஜிலிங்கம், அனந்தி சசிதரன், பா.கஜதீபன், கனகரட்ணம் விந்தன், பரஞ்சோதி மற்றும் வலி வடக்கு பிரதேசசபைத் தலைவர் சுகிர்தன், வலிவடக்கு உப தவிசாளர் சஜீவன், நல்லூர் பிரதேசசபைத் தலைவர் வசந்தகுமார், உள்ளிட்ட பலரும் கலந்துகொண்டிருந்தார்கள். இதனைத் தொடர்ந்து நினைவுக்கூட்டம் இடம்பெற்றது. இதில் மறவன்புலவு க.சச்சிதானந்தம் ஐயா, மாவை சேனாதிராஜா, தர்மலிங்கம் சித்தார்த்தன், சுரேஸ் பிரேமச்சந்திரன், எம்.கே.சிவாஜிலிங்கம் ஆகியோர் உரையாற்றினார்கள். இங்கு உரையாற்றிய மறவன்புலவு சச்சிதானந்தம் ஐயா அவர்கள், தமிழராய்ச்சி
ஒரு அரசியல் மாற்றத்தை விரும்பி இலங்கை மக்கள் மைத்திரிபால சிறிசேன அவர்களை ஜனாதிபதியாக தேர்ந்தெடுத்திருக்கின்றார்கள். விசேடமாக தமிழ், முஸ்லிம், மலைய மக்கள் ஏகோபித்து வாக்களித்து அவருடைய வெற்றிக்கு வழியமைத்துள்ளார்கள். அத்துடன் பிரத்தியேகமாக வடகிழக்கு தமிழ் மக்களைப் பொறுத்தமட்டில் மிகப் பெருவாரியாக, கடந்த மாகாண சபைத் தேர்தலிலே வழங்கிய வாக்குகளைவிடவும் அதிகமான வாக்குகளை அளித்து அவருக்கு தங்களுடைய ஏகோபித்த ஆதரவினை தெரிவித்துள்ளார்கள். அத்துடன் தமிழ் மக்கள் இன்று முகம்கொடுக்கின்ற முக்கிய பிரச்சினைகளுக்கு ஒரு நியாயமான தீர்வு கிடைக்கும் என்ற நம்பிக்கையிலேயே தங்கள் வாக்குகளை அளித்துள்ளார்கள். இடம்பெயர்ந்து மிக நீண்டகாலமாக தங்களுடைய சொந்த நிலங்களுக்குச் செல்லமுடியாத மக்கள் மீளக் குடியேற வேண்டுமென்ற ஒரு அவாவிலே இருக்கின்றார்கள். சிறைகளிலே வாடுகின்ற இளைஞர்கள், அவர்களுக்கு நிபந்தனையற்ற விடுதலை வேண்டுமென்று எதிர்பார்க்கின்றார்கள். அதேவேளையில் காணாமற் போனவர்கள் சம்பந்தமாக ஒரு நியாயமான, நீதியான தீர்வு காணப்பட வேண்டும் என்பதில் அவர்கள் அக்கறையாக இருக்கின்றார்கள். இவைகளெல்லாம் உடனடியாகச் செய்ய வேண்டிய விடயங்களாக இருந்தாலும்; காலக்கிரமத்தில் தமிழ் மக்களுடைய நியாயமான அரசியல் கோரிக்கையான ஒன்றுபட்ட இலங்கைக்குள் ஒரு நியாயமான தீர்வினை எதிர்பார்த்தும் அவர்கள் தமது வாக்குகளை அளித்திருக்கின்றார்கள். தமிழ் தேசியக் கூட்டமைப்பினதும், அதன் தலைவர் இரா.சம்பந்தன் அவர்களினதும் கோரிக்கையைக் கருத்திற்கொண்டு மக்கள் பெருவாரியான வாக்குகளை அளித்துள்ளார்கள். திரு. இரா.சம்பந்தன் அவர்களின் சாணக்கியமான நகர்வுகள்மூலம் அவர் கூறுவதுபோல, இந்த 2015ஆம் ஆண்டிற்குள் தமிழ் மக்கள் கௌரவத்துடன் கூடிய ஒரு சமாதான வாழ்வையும் ஒரு அரசியல் தீர்வையும் எட்டுவார்கள் என்று நாம் எதிர்பார்ககின்றோம்.