மாணவர்களுக்கு அப்பியாசக் கொப்பிகள் வழங்கிவைப்பு, வறிய குடும்பத்திற்கு நிதியுதவி-
நுவரெலியா, தலவாக்கலை லோகித் தோட்டத்தைச் சேர்ந்த வறிய மாணவர்களுக்கு புளொட் தலைவரும், முன்னாள் பாராளுமன்ற உறுப்பினரும், தமிழ் தேசியக் கூட்டமைப்பின் வட மாகாணசபை உறுப்பினருமாகிய கௌரவ தர்மலிங்கம் சித்தார்த்தன் அவர்களினால் கடந்த 16.01.2015 வெள்ளிக்கிழமை அன்று அப்பியாசக் கொப்பிகள் வழங்கிவைக்கப்பட்டுள்ளது. மேற்படி அப்பியாசக் கொப்பிகள் லோகித் தோட்டத்தின் கோயில் பரிபாலன சபையின் ஊடாக வழங்கிவைக்கப்பட்டது. இதேவேளை தலவாக்கலை லோகித் தோட்டத்தைச் சேர்ந்த புற்றுநோயால் பாதிக்கப்பட்டிருக்கும் வறுமைக்கோட்டின்கீழுள்ள நான்கு பிள்ளைகளின் தாயாரான 39வயதுடைய சுரேஸ் பெத்தாயி என்பவருக்கு கௌரவ தர்மலிங்கம் சித்தார்த்தன் அவர்களினால் கடந்த 15.01.2015 வியாழக்கிழமை அன்று 10,000 ரூபாய் நிதியுதவி தலவாக்கலை தோட்ட நிர்வாகத்தின் ஊடாக வழங்கிவைக்கப்பட்டது. மேற்படி உதவிகள் புளொட் அமைப்பின் ஜேர்மன் கிளைத் தோழர்களினால் வழங்கப்பட்ட நிதியிலிருந்து கொடுக்கப்பட்டுள்ளன.
ஜனனம் : 17 ஏப்ரல் 1968 
வவுனியா சைவப்பிரகாச மகளிர் கல்லூரி ஆரம்ப பாடசாலையின் கால்கோள் விழா இன்றுகாலை (19.01.2015) 9மணியளவில் ஆரம்ப பாடசாலையின் அதிபர் திருமதி. கி.நந்தபாலன் தலைமையில் கல்லூரி வளாகத்தில் நடைபெற்றது. இந் நிகழ்வில் பிரதம விருந்தினராக புளொட் முக்கியஸ்தரும், வவுனியா நகரசபை முன்னாள் உப நகரபிதாவும், கோயில்குளம் இளைஞர் கழக ஸ்தாபகருமான கௌரவ சந்திரகுலசிங்கம் (மோகன்) அவர்களும் சிறப்பு விருந்தினர்களாக வலயக்கல்வி பணிமனையைச் சேர்ந்த திருமதி .N.கிரேனியர், ஆரம்ப பாடசாலை அபிவிருத்தி சங்க செயலாளர் திரு.சு.தவபாலன், சைவப்பிரகாச மகளிர் கல்லூரி அதிபர் செல்வி. உமா இராசையா, பிரதி அதிபர் திருமதி. க.பாக்கியநாதன் ஆகியோரும் கலந்து சிறப்பித்தனர். மேற்படி கால்கோள் விழா நிகழ்வில் மாணவர்களின் கலை நிகழ்ச்சிகளும் நடைபெற்றமை குறிப்பிடத்தக்கது. இந் நிகழ்வில் சமூக ஆர்வலர் திரு. கண்ணதாசன், கோயில்குளம் இளைஞர் கழகத்தின் சஞ்சீ, நிகேதன், பெற்றோர்கள், ஆசிரியர்கள், பழைய மாணவர்கள், மற்றும் நலன் விரும்பிகள் என பலரும் கலந்து கொண்டிருந்தமை இங்கு குறிப்பிடத்தக்கது.
இலங்கையில் கிழக்கு மாகாணசபையில் ஏற்படவுள்ள ஆட்சி மாற்றத்தின்போது, முதலமைச்சர் பதவியில் விட்டுக் கொடுப்புக்கு இடமளிக்க வேண்டாம் என்று கிழக்கு மாகாணசபையின் பிரதான எதிர்க்கட்சியான தமிழ்த் தேசியக் கூட்டமைப்பின் உறுப்பினர்கள் 11 பேரும் இரா. சம்பந்தன் உள்ளிட்ட கூட்டமைப்பின் தலைவர்களை கூட்டாக சந்தித்து இந்த கோரிக்கையை முன்வைத்துள்ளனர்.
விமான சேவைகள் இராஜங்க அமைச்சர் ஜனாதிபதி சட்டத்தரணி பைஸர் முஸ்தபா தனது கடமைகளை இன்று பொறுப்பேற்றுள்ளார். பத்தரமுல்லை- செத்சிரிபாயவில் உள்ள அமைச்சு அலுவலகத்தில் இது தொடர்பான நிகழ்வு இடம்பெற்றுள்ளது. கடந்த அரசாங்கத்தில் முதலீட்டு ஊக்குவிப்பு பிரதி அமைச்சராக பைஸர் முஸ்தபா பதவி வகித்திருந்தார். இதேவேளை சிறுவர் விவகார இராஜாங்க அமைச்சர் ரோசி சேனாநாயக்க தமது கடமைகளை இன்று பொறுப்பேற்றார். செத்சிரியாபவில் உள்ள சிறுவர் விவகார அமைச்சு அலுவலகத்தில் இந்த நிகழ்வு இடம்பெற்றது. ஐக்கிய தேசியக் கட்சியின் கொழும்பு மேற்கு தொகுதி அமைப்பளராகவும் ரோஸி சேனாநாயக்க செயற்பட்டு வருகின்றார். இதேவேளை ஊவா மாகாண முதலமைச்சர் ஹரீன் பெர்னாண்டோ எதிர்வரும் 22ஆம் திகதி உத்தியோகபூர்வமாக தமது கடமைகளை ஆரம்பிக்கவுள்ளார். பல்வேறு அழுத்தங்கள் வந்தபோதிலும் முதலமைச்சராக பதவி ஏற்பதற்கு தேவையான சட்ட ஏற்பாடுகளை பூர்த்தி செய்துள்ளதாக ஊவா முதலமைச்சர் ஹரீன் பெர்னாண்டோ குறிப்பிட்டுள்ளார்.
இலங்கையில் 13-வது சட்டத்திருத்தம் முழுமையாக அமுல்படுத்தப்பட வேண்டும் என்ற இந்தியாவின் நிலைப்பாட்டில் எந்த மாற்றமுமில்லை என்று பாராளுமன்ற விவகாரங்கள் துறை அமைச்சர் வெங்கையா நாயுடு நேற்று சென்னை விமான நிலையத்தில் வைத்து கூறியுள்ளார். இலங்கையில் ஆட்சி மாற்றம் ஏற்பட்டுள்ளது. இலங்கை முன்னாள் ஜனாதிபதி ராஜபக்ஷ இந்தியாவையும் சீனாவையும் மோதவிட நினைத்தார் என இலங்கை பிரதமர் ரணில் விக்ரமசிங்க கூறியிருப்பது மிகவும் கவனிக்கப்பட வேண்டிய முக்கியமான கருத்து. இந்தியாவுக்கும் இலங்கைக்கும் பழங்காலம் முதலே நல்ல நட்பு இருந்தது. அது தொடர வேண்டும் என்பதில் இந்தியா உறுதியாக உள்ளது. மேலும் இலங்கையில் புதிய அரசு அமைந்துள்ள நிலையில், தமிழர்கள் நிலை மாறும் என்ற நம்பிக்கை உள்ளது. மேலும், முன்னாள் பிரதமர் ராஜீவ் காந்தி முயற்சியால் ஏற்பட்ட இலங்கையின் 13-வது சட்டத்திருத்தம் முழுமையாக அமல்படுத்தப்பட வேண்டும் என்ற நிலைப்பாட்டிலிருந்து இந்தியா என்றும் மாறவில்லை என அவர் கூறியுள்ளார்.
வடக்குக்கான அதிவேக நெடுஞ்சாலையின் பணிகளை தற்காலிகமாக இடைநிறுத்தி வைப்பதற்கு அரசாங்கம் தீர்மானித்துள்ளது. அந்த நெடுஞ்சாலைக்கான முழுமையான செலவுகளை ஆராய்ந்து பார்ப்பதற்காவே இந்த பணிகள் இடைநிறுத்திவைக்கப்பட்டுள்ளது. 6 ஆயிரத்து 750 கோடி ரூபாய் செலவில் நிர்மாணிக்கப்படவுள்ள வடக்குக்கான அதிவேக நெடுஞ்சாலையின் செங்கடகல நுழைவாயிலுக்கான அடிக்கல், முன்னாள் ஜனாதிபதி மஹிந்த ராஜபக்ஷவினால் கடந்த நவம்பர் மாதம் 14ஆம் திகதி நாட்டப்பட்டது. 300 கிலோமீற்றர் நீலத்தைக் கொண்ட இந்த நெடுஞ்சாலையானது, நான்கு கட்டங்களாக நிர்மாணிக்க ஏற்கனவே தீர்மானிக்கப்பட்டிருந்தது. முதற்கட்டமாக, என்டேரமுல்லயில் இருந்து அம்பேபுஸ்ஸ வரையிலும், இரண்டாம் கட்டமாக குருநாகல் முதல் பெலெந்தெனிய வரையிலும், மூன்றாம் கட்டமாக தம்புள்ளை வரையிலும் நான்காம் கட்டமாக தம்புள்ளையிலிருந்து யாழ்ப்பாணம் வரையிலும் நிர்மாணிப்பதற்கு ஐக்கிய மக்கள் சுதந்திர கூட்டமைப்பு அரசாங்கத்தினால் தீர்மானிக்கப்பட்டிருந்தமை குறிப்பிடத்தக்கது. இந்த திட்டத்தை அமுலாக்குவது குறித்து விரிவாக ஆராயப்பட்டதன் பின்னரே தீர்மானம் எடுக்கப்படும் என்று நிதியமைச்சர் ரவி கருணாநாயக்க தெரிவித்துள்ளார். 
இந்தியாவுக்கு மூன்று நாள் விஜயம் மேற்கொண்டுள்ள இலங்கை வெளிவிவகார அமைச்சர் மங்கள சமரவீர புதுடில்லி சென்றுள்ளார். இலங்கை மற்றும் இந்திய வெளிவிவகார அமைச்சர்கள் கலந்துக்கொண்ட உயர்மட்டக்குழு கூட்டம் இன்று புதுடில்லியில் நடைபெற்றுள்ளது. இவர் நாளையதினம் பிரதமர் நரேந்திர மோடியை சந்திக்கவுள்ளார். இலங்கையில் புதிய அரசாங்கம் பொறுப்பேற்ற ஒரு வார காலத்திற்குள், அமைச்சர் மங்கள சமரவீர இந்தியாவிற்கு பயணம் மேற்கொண்டுள்ளதால் இது முக்கியத்துவம் வாய்ந்த சுற்றுப்பயணமாக கருதப்படுகிறது. மேலும் மங்கள சமரவீர மற்றும் இந்திய வெளிவிவகார அமைச்சர் சுஸ்மா சுவராஜ் இடையேயான சந்திப்பின்போதும் இலங்கை இந்தியாவுடனான உறவுக்கு முக்கியத்துவம் அளிப்பதாக கூறியதாகவும் தகவல்கள் தெரிவிக்கின்றன. இன்றைய சந்திப்பின்போது மீனவர்கள் விவகாரம், தமிழர்கள் நல்வாழ்வு, வர்த்தகம் உள்ளிட்ட பல்வேறு விவகாரங்கள் குறித்து விவாதிக்கப்பட்டதாகவும் கூறப்படுகின்றது.
புதிதாக அமைக்கப்பட்டுள்ள மைத்திரிபால சிறிசேன தலைமையிலான அரசாங்கத்துடன் இணைந்து பணியாற்ற எதிர்பார்த்துள்ளதாக அமெரிக்கா தெரிவித்துள்ளது. புதிய அரசாங்கத்திடமிருந்து இலங்கை மக்கள் எதை எதிர்பார்க்கிறார்களோ அதனையே நாங்களும் எதிர்பார்க்கிறோம் என குறிப்பிட்ட தெற்கு மற்றும் மத்திய வலயத்துக்கான அமெரிக்காவின் உதவி இராஜாங்க செயலாளர் நிஸா பிஸ்வால் மக்களுக்கு அளித்த தேர்தல் வாக்குறுதிகளை புதிய அரசு நிறைவேற்ற நாம் ஆதரவளிக்க வேண்டும் எனவும் சுட்டிக்காட்டியுள்ளார். இலங்கையில் ஜனநாயகம் தொடர்பாக வழங்கப்பட்ட வலுவான தீர்ப்பை நாங்கள் வரவேற்கிறோம். ஆட்சி மாற்றம் அமைதியான முறையில் இடம்பெற்றுள்ளது. புதிய அரசாங்கம் ஆட்சிபொறுப்பை ஏற்று, தனது தேர்தல் பிரசாரத்தின்போது அளிக்கப்பட்ட பல வாக்குறுதிகளை நிறைவேற்ற தொடங்கியுள்ளது என உதவி இராஜாங்க செயலாளர் நிஸா பிஸ்வால் மேலும் கூறியுள்ளார்.
ஜயந்த கெடகொடவின் பாராளுமன்ற உறுப்பினர் பதவியை சரத் பொன்சேகாவுக்கு வழங்குவதற்கு இணக்கப்பாடு எட்டப்பட்டுள்ளதாக தெரியவந்துள்ளது. சரத் பொன்சேகா விடுத்த வேண்டுகோளுக்கு அமைய இந்த தீர்மானத்தை மேற்கொண்டதாக ஜயந்த கெடகொட குறிப்பிட்டுள்ளார். ஜனநாயகக் கட்சி சார்பாக பாராளுமன்றத்துக்கு தெரிவுசெய்யப்பட்ட சரத் பொன்சோகவின் குடியுரிமை இரத்துச் செய்யப்பட்டதனை அடுத்து அவரது பாராளுமன்ற உறுப்பினர் பதவி ஜயந்த கெடகொடவிற்கு வழங்கப்பட்டமை இங்கு குறிப்பிடத்தக்கது.
காலி துறைமுகத்தில் நிறுத்திவைக்கப்பட்டிருந்த மஹநுவர கப்பலில் உள்ள 12 கொள்கலன்கள்களில் ஆயுதங்கள் இருப்பதாக பொலிஸாருக்கு தகவல கிடைத்துள்ளது. அந்த தகவலின் அடிப்படையில் நங்கூரமிடப்பட்டிருந்த மஹநுவர கப்பல் சோதனைக்கு உட்படுத்தப்பட்டது.
முன்னாள் ஜனாதிபதி மஹிந்த ராஜபக்ஷ மற்றும் அவருடைய புதல்வரும் நாடாளுமன்ற உறுப்பினருமான நாமல் ராஜபக்ஷ ஆகியோரின் முகங்கள் பொறிக்கப்பட்ட 68,000 சுவர்க்கடிகாரங்கள் சபுகஸ்கந்த பொலிஸ் பிரிவுக்குட்பட்ட ஹெய்யந்துடுவ, மாபிம பிரதேசத்திலிருந்த களஞ்சியசாலையொன்றில் சட்டவிரோதமான முறையில் பதுக்கி வைக்கப்பட்டிருந்த நிலையிலேயே மீட்கப்பட்டுள்ளன.