வவுனியா விபத்தில் படுகாயமடைந்த உயர்தர மாணவன் உயிரிழப்பு-
வவுனியாவில் நேற்று (30.01.2015) இடம்பெற்ற வீதி விபத்தில் படுகாயமடைந்த மாணவர்களில் ஒருவரான 17வயதான செல்வன் சற்குணராசா சுலக்சன் வவுனியா வைத்தியசாலையில் சிகிச்சை பெற்றுவந்த நிலையில் சிகிச்சை பலனின்றி நேற்றிரவு உயிரிழந்துள்ளார். வவுனியா தமிழ் மகாவித்தியாலய உயர்தர வகுப்பு மாணவரான வவுனியா தோணிக்கல்லைச் சேர்ந்த இம்மாணவர் வர்த்தகப் பிரிவில் கல்வி பயின்று வந்தார். சம்பவம் பற்றி மேலும் தெரியவருவதாவது. வவுனியா தமிழ் மகா வித்தியாலயத்திற்கு முன்பாக நேற்று நண்பகல் 12.15அளவில் கொழும்பிலிருந்து வந்த பஸ்வண்டி பாடசாலை விளையாடடுப் போட்டியினில் பங்குபற்றிவிட்டு பாடசாலை திரும்பிய மாணவர்கள் பயணித்த மோட்டார் சைக்கிளுடன் மோதி;யுள்ளது. இதன்போது மோட்டார் சைக்கிளில் பயணித்த உயர்தர வகுப்பு மாணவர்கள் இருவரும் படுகாயமடைந்து வவுனியா வைத்தியசாலையில் அனுமதிக்கப்பட்டிருந்தனர். இந்நிலையில் மாணவன் சற்குணராசா சுலக்சன் சிகிச்சை பலனின்றி நேற்றிரவு 8.30அளவில் மரணமாகியுள்ளதுடன், இவருடன் பயணித்த இன்னொரு உயர்தர வகுப்பு மாணவரான சுப்பிரமணியம் கிறிஷாந்தன் வவுனியா வைத்தியசாலையில் தொடர்ந்து சிகிச்சைபெற்று வருகின்றார். உயிரிழந்த மாணவன் சற்குணராசா சுலக்சனின் இறுதிக் கிரியைகள் நாளை ஞாயிற்றுக்கிழமை அன்னாரது இல்லத்தில் நடைபெற்று தோணிக்கல் இந்து மயானத்தில் அவரது பூதவுடல் நல்லடக்கம் செய்யப்படும்.
தமிழ் தேசிய இளைஞர் கழகத்தின் கற்றல் ஊக்குவிப்பு நிகழ்ச்சித்திட்டத்தின் கீழ் வவுனியா எல்லப்பர் மருதன்குளத்தைச் சேர்ந்த மாணவிக்கு அவரது கற்றல் செயற்பாடுகளை ஊக்குவிக்கும் முகமாக சிறியளவு நிதியுதவியினை தமிழ் தேசிய இளைஞர் கழகத்தின் அமெரிக்க கிளை வழங்கியது. இவ் நிகழ்வு இன்றைய தினம் தமிழ் தேசிய இளைஞர் கழகத்தின் அலுவலகத்தில் நடைபெற்றது. தமிழ் தேசிய இளைஞர் கழகத்தின் சார்பில் இவ் உதவியினை புளொட் அமைப்பின் முக்கியஸ்தர்களுள் ஒருவரும், வவுனியா நகரசபையின் முன்னாள் உப நகரபிதாவும் கழகத்தின் ஸ்தாபகருமான திரு க.சந்திரகுலசிங்கம்(மோகன்) அவர்கள் மாணவியின் தாயாரிடம் வழங்கி வைத்தார். இவ் நிகழ்வில் தமிழ் தேசிய இளைஞர் கழகத்தின் தலைவர் திரு சு.காண்டீபன், செயலாளர் திரு ஸ்ரீ.கேசவன், ஊடகப் பிரிவைச்சேர்ந்த திரு செ.சுகந்தன் ஆகியோரும் பங்கேற்றிருந்தனர்.
கிராமிய வைத்தியசாலைகளுக்கு உதவும் நோக்கில் ஜேர்மன் வாழ் புலம்பெயர் தமிழர்கள் சார்பில் சற்கரநாற்காலி வட்டுக்கோட்டை பிரதேச வைத்தியசாலைக்கும் வழங்கப்பட்டது. அதனை வைத்திய சாலைப் பொறுப்பதிகாரி வைத்தியகலாநிதி திருமதி காந்தநேசன் பெற்றுக்கொண்டார்.
புதிய அரசாங்கத்தின் கீழ் பத்திரிகை சுதந்திரம் அதிகரிக்கும் என தான் நம்புவதாக பிரித்தானிய வெளிநாட்டு மற்றும் பொதுநலவாயத்துக்கான இராஜாங்க அமைச்சர் ஹியூ ஸ்வைர் தெரிவித்துள்ளார். அவர், யாழ்ப்பாணத்துக்கு விஜயம் செய்துவிட்டு திரும்பிய பின்னரே மேற்கண்டவாறு கூறியுள்ளார். முதற்தடவையாக யாழ்ப்பாணம் சென்ற இவர், வடமாகாண முதலமைச்சர் சி.வி. விக்னேஸ்வரனை சத்தித்துப் பேச்சுவார்த்தை நடத்தினார். யாழ்ப்பாணத்தில் அவர் பிரிட்டிஷ் கவுன்ஸில், ஐக்கிய இராச்சியம் நிதியுதவி வழங்கும் ஹலோ நம்பிக்கை நிதியத்தின் கண்ணிவெடியகற்றல் நடவடிக்கைகள், ஆனையிறவு, சபாபதிபிள்ளை நலன்புரி கிராமம் ஆகியவற்றை பார்வையிட்டார். வடமாகாணத்தில் பல்வேறு பரிமாணம் கொண்ட பிரச்சினைகளை நான் அறிந்துகொண்டேன். நல்லிணக்கம், பொறுப்புகூறல், இராணுவத்தின் வகிபாகம், அரசியல் தீர்வுக்கான வாய்ப்புகள், இலங்கைக்கு பிரித்தானியா உதவ கூடிய வழிமுறைகள் உள்ளிட்ட விடயங்கள் தொடர்பில் முதலமைச்சருடன் பேசினேன். அதுமட்டுமன்றி மீண்டும் யுத்தத்துக்கு பலியாகக் கூடாதென்பதை வலியுறுத்தும் சின்னமாக ஆனையிறவுள்ளது என்றார்
கடந்த 22.01.2015 அன்று வலி மேற்கு பிரதேசத்தில் வலி மேற்கு பிரதேச சபைத் தவிசாளர் திருமதி நாகரஞ்சினி ஐங்கரன் தலைமையில் சங்கானை வைத்திய சாலைக்கு ஜேர்மனிய நாட்டு புலம் பெயர் தமிழ் மக்களால் அன்பளிப்பு செய்யப்பட்ட சக்கரநாற்காலிகள் வழங்கப்பட்டது. இவ் நிகழ்வில் சங்கானை வைத்தியசாலைப் பொறுப்பதிகாரி வைத்தியகலாநிதி திரு. செந்தூரன், முன்னாள் பாராளுமன்ற உறுப்பினரும் இந்நாள் வடமாகான சபை உறுப்பினருமான கௌரவ தர்மலிங்கம். சித்தார்த்தன், ஜேர்மன் நாட்டிலிருந்து வருகை தந்த சபாரட்ணம் ஜெயகுமார்(சாமியார்), திருமதி. ஜெயகுமார், வசந்தி ஆகியோர் வருகை தந்திருந்தனர். தொடர்ந்து வைத்திய சாலையின் செயற்பாடுகள் மற்றும் பற்றாக் குறைகள் தொடர்பில் மேற்படி குழுவினர் ஆராய்ந்ததுடன் சிறு வேலைத்திட்டங்கள் தொடர்பில் தாம் உதவுவதாகவும் தெரிவித்துள்ளனர். இதே வேளை வைத்தியசாலை பொறுப்புவைத்தியரது கோரிக்கைகளில் ஒன்றான கழிவுகள் போடுவதற்கான பிளாஸ்டிக் பெட்டிகளை கொள்வனவு செய்யும் பொருட்டு வைத்திய சாலை நலன்புரிச் சங்கத்திற்கு வழங்குவதற்கென சிறு தொகைப்பணத்தினையும் ஜேர்மன் நாட்டின் தழிழ் உறவுகள் சார்பில் சபாரட்ணம்.ஜெயகுமார் வழங்கிவைத்தார்.
பொன்னாலைச் சந்தியில் மிக நீண்ட காலமாக பொதுமக்களது பங்களிப்புடன் தலைவர் ஆனந்தசித்திரசேனன் அவர்களால் முன்னெடுக்கப்பட்ட பொன்னாலை நாராயணன் தாகசாந்தி நிலையம் பொன்னாலை நாராயணன் அன்னதான மண்டபம் மற்றும் பொன்னாலை சனசமூக நிலையம் என்பன 15.01.2015 அன்று மதியம் திறந்து வைக்கப்பட்டது. இவ் நிகழ்வில் பிரதம விருந்தினராக சங்கானை பிரதேச செயலர் அ.சோதிநாதன் கலந்து கொண்டார். சிறப்பு விருந்தினராக வலி மேற்கு பிரதேச சபைத் தவிசாளர் திருமதி நாகரஞ்சினி ஐங்கரன் அவர்களும் கொளரவ விருந்தினராக நல்லைக் குருமணிகளும் கலந்து சிறப்பித்துக் கொண்aடனர். இவ் நிகழ்வில் பொன்னாலை தகசாந்தி நிலையத்தினை நல்லைக் குருமணிகள் திறந்து வைத்தார் அதனைத் தொடர்ந்து பிரதேச செயலர் அ.சோதிநாதன் அவர்களால் பொன்னாலை நாராயணன் அன்னதான மண்டபம் திறந்து வைக்கப்பட்டது இதனைத் தொடர்ந்து மேற்கு பிரதேச சபைத் தவிசாளர் திருமதி நாகரஞ்சினி ஐங்கரன் அவர்களால் பொன்னாலை நாராயணண் சனசமூக நிலையம் திறந்து வைக்கப்பட்டது.
