தமிழ் தேசிய இளைஞர் கழகத்தால் பாடசாலை மைதானம் புனரமைப்பு-
தமிழ் தேசிய இளைஞர் கழகத்தின் இணைப்பாடவிதான செயற்பாடுகளின் ஊக்குவிப்பு நிகழ்ச்சித் திட்டத்தின் கீழ் வவுனியா தெற்கு வலயத்திற்கு உட்பட்ட சமளங்குளம் அரசினர் தமிழ்க் கலவன் பாடசாலையின் மைதானம் நேற்று (20.03.2015) வெள்ளிக்கிழமை புனரமைப்பு செய்யப்பட்டுள்ளது. சமளங்குளம் யுரேனஸ் கழகம் மற்றும் சமளங்குளம் அரசினர் தமிழ்க் கலவன் பாடசாலையின் அதிபர் விடுத்த வேண்டுகோளுக்கிணங்க தமிழ் தேசிய இளைஞர் கழக கட்டார் கிளையின் நிதியுதவியுடன் பாடசாலை மைதானம் புனரமைப்பு செய்யப்பட்டது. இவ் நிகழ்வில் புளொட் அமைப்பின் முக்கியஸ்தரும், வவுனியா நகரசபையின் முன்னாள் உப நகரபிதாவும் தமிழ் தேசிய இளைஞர் கழக ஸ்தாபகருமான திரு க.சந்திரகுலசிங்கம்(மோகன்) அவர்களும், பாடசாலை அதிபர் திரு. சிவானந்தன், பாடசாலை ஆசிரியர்கள், தமிழ் தேசிய இளைஞர் கழகத் தலைவர் திரு. சு.காண்டீபன், செயலாளர் ஸ்ரீ.கேசவன், பொருளாளர் .த.நிகேதன், ஊடக இணைப்பாளர் வ.பிரதீபன், சமளங்குளம் யுரேனஸ் கழகத்தின் தலைவர் திரு.சிம்சுபன், அமைப்பாளர் ஜெயந்தன், உறுப்பினர்களான தனோஜன், விமர்சன், மற்றும், நவநீதன் ஆகியோர் கலந்து கொண்டனர்.
தேசிய கீதத்தை தமிழ் மொழியில் பாடுவதை தமிழ் இனவாதமாகவோ அல்லது சிங்கள இனவாதமாகவோ அர்த்தப்படுத்த முயற்சிக்க வேண்டாம் என நேற்று சபையில் வலியுறுத்திய முன்னாள் அமைச்சர் வாசுதேவ நாணயக்கார தேசிய கீதத்தை தமிழ் மொழியில் பாடுவதற்கு அரசியலமைப்பு மீறல் அல்ல என்றும் சுட்டிக்காட்டினார். பாராளுமன்றத்தில் நேற்று இடம்பெற்ற சபை ஒத்திவைப்பு பிரேரணை விவாதத்தில் உரையாற்றும்போதே வாசுதேவ நாணயக்கார எம்.பி. இவ்வாறு தெரிவித்தார். சபையில் அவர் தொடர்ந்து உரையாற்றுகையில், இலங்கையில் அரசியலமைப்பின் தமிழ் மொழியாக்கத்தில் 205 ஆம் பக்கத்தில் தேசிய கீதம் தமிழ் மொழியில் எழுதப்பட்டுள்ளது. இந்த தமிழ் மொழி பெயர்ப்பை 1940 களில் நல்லதம்பி பண்டிதர் செய்தார். அவரது மொழிபெயர்ப்பில் சிங்களத்தில் இயற்றப்பட்ட தேசிய கீதத்தின் அர்த்தம் எதுவிதமான மாற்றமும் இல்லாமல் அனைத்து சொற்பதங்களும் தமிழில் அமைந்துள்ளது. சிங்களத்தில் ஸ்ரீலங்கா நமோ மாதா என்றும் அதேபோன்று தமிழில் நமோ நமோ தாயே என்றும் ஒரு பொருளில் அர்த்தத்தில் மொழிபெயர்க்கப்பட்டுள்ளது. அது மட்டுமல்லாது சிங்கள இசை மெட்டுக்கு ஏற்ற வகையிலேயே தமிழிலும் உள்ளது. எந்தவிதமான மாற்றமும் கிடையாது. அது மட்டுமல்லாது அரசியலமைப்பிலும் தமிழில் உள்ளது. தமிழில் பாடுவது அரசியல் அமைப்பு மீறல் அல்ல. அது அரசியலமைப்புக்கு உட்பட்டதேயாகும். தமிழ் மக்கள் பெரும்பான்மையாக வாழும் பகுதிகளில் தமிழ் மொழியில் தேசிய கீதத்தை பாடலாம். அதேபோன்று சிங்கள மக்கள் பெரும்பான்மையாக வாழும் பிரதேசங்களில் சிங்களத்திலும் தேசிய கீதத்தை பாடலாம். பெரும்பாலும் தேசிய நிகழ்ச்சிகளில் சிங்கள மொழியிலேயே தேசிய கீதம் பாடப்படுகின்றது. நான் சமூக ஒருமைப்பாடு அமைச்சராக அந்த ஆட்சியில் இருந்த போது ஒரு யோசனையை முன்வைத்தேன். தென்னாபிரிக்காவைப் போல் இலங்கையிலும் தேசிய கீதத்தை சிங்கள தமிழ் சொற்பதங்களைக் கொண்டு சேர்த்து பாட வேண்டும் என. அப்போது தேசிய கீதத்தில் இரண்டு மொழிகளும் கலந்து விடும். ஆனால் அது நிறைவேறவில்லை. ஜனாதிபதி சிங்களத்தில் உரையாற்றும் போது அந்த உரையை தமிழில் மொழி பெயர்க்கின்றோம். எனவே தேசிய கீதத்தை தமிழ் மொழியில் பாடுவதை தமிழ் இனவாதமாகவோ அல்லது சிங்கள இனவாதமாகவோ அர்த்தப்படுத்தல் கூடாது என்றும் வாசுதேவ நாணயக்கார எம்.பி. மேலும் குறிப்பிட்டுள்ளார்.
பயங்கரவாத தடைச்சட்டத்தின் கீழ் கைதுசெய்யப்பட்டு பிணையில் விடுவிக்கப்பட்ட ப.ஜெயக்குமாரியின் மகளான விபூசிகாவை தாயாருடன் செல்வதற்கு கிளிநொச்சி மாவட்ட நீதிவான் நீதிமன்றம் அனுமதி மறுத்துள்ளது. புலிகளை மீளக் கட்டியெழுப்புவதற்கு முயற்சித்தார் என்ற குற்றச்சாட்டில் பயங்கரவாத தடைச்சட்டத்தின்கீழ் கைது செய்யப்பட்ட ஜெயக்குமாரி பிணையில் விடுவிக்கப்பட்டபோதும் அவரது மகளான விபுசிகா நீதிமன்ற உத்தரவிற்கு அமைய கிளிநொச்சியில், இயங்கிவரும் மகாதேவா சைவச்சிறுவர் இல்லத்தில் தங்க வைக்கப்பட்டிருந்தார் விபுசிகாவை சிறுவர் இல்லத்தில் இருந்து பொறுப்பேற்பதற்கு அவரது தாயான ஜெயக்குமாரி கண்டாவளை பிரதேச சிறுவர் நன்னடத்தை அதிகாரி ஊடாக விண்ணப்பித்திருந்தார். இந்நிலையில் இம்மனுமீதான விசாரணை நேற்று கிளிநொச்சி மாவட்ட நீதிமன்றத்தில் நீதவான் எம்.ஐ.வகாப்தீன் முன்னிலையில் எடுத்துக்கொள்ளப்பட்டது. இதன்போது கண்டாவளை பிரதேச சிறுவர் நன்னடத்தை அதிகாரியுடன் விபுசிகா மற்றும் அவரது தாயார் ஆகியோர் ஆயராகி இருந்தார். ஜெயக்குமாரி சார்பாக ஆயரான சட்டத்தரணிகளான திருமதி. எஸ்.விஜயராணி, ம.கிறேசியன், சுந்தரேசசர்மா, துசியந்தி, றைகான், ஆகியோர் ஆயராகி குறித்த சிறுமியை பெற்றோருடன் செல்வதற்கு நீதிமன்றம் அனுமதிக்க வேண்டும் என கோரியிருந்தனர். அதன்போது ஜெயக்குமாரியும் அவரது மகளான விபுசிகாவும் பயங்கரவாத தடுப்புச்சட்டத்தின் கீழ் கைதுசெய்யப்பட்டுள்ளனர் என பயங்கரவாத புலனாய்வுப்பிரிவினரால் சுட்டிக்காட்டப்பட்டது. அத்துடன் சந்தேகநபர்களாக கைது செய்யப்பட்டுள்ளதாலேயே குறித்த சிறுமி சிறுவர் இல்லத்தில் தங்க வைக்கப்பட்டதாகவும் கூறப்பட்டது. இதனையடுத்து விபுசிகா குற்றச்சாட்டிலிருந்து விடுவிக்கப்பட்ட பின்னரே தயாரிடம் இணைவதற்கு நீதிமன்றம் அனுமதி வழங்கும் என நீதிவான் எம்.ஐ.வகாப்தீன் குறிப்பிட்டதுடன் எதிர்வரும் 26ஆம் திகதிக்கு வழக்கு ஒத்திவைக்கப்பட்டது.
முன்னாள் தேர்தல் ஆணையாளர் ஆர்.கே. சந்ராநந்த டி சில்வா காலமானார். ராஜகிரியவில் உள்ள அவரது வீட்டில் வைத்து தமது 78வயதில் இன்று அதிகாலை அவர் உயிரிழந்ததாக தெரிவிக்கப்பட்டுள்ளது. அவர் 1982ம் ஆண்டு மே மாதம் நான்காம் திகதி இலங்கையின் தேர்தல் ஆணையாளராக பதவி ஏற்றார். அவர் ஐக்கிய அரபு ராஜ்சியத்துக்கான இலங்கையின் தூதுவராகவும் செயற்பட்டிருந்தார். 
பாடசாலையில் உள்ள குடிநீர் தாங்கியில் விஷம் கலக்கப்பட்ட நீரை அருந்திய நிலையில் யாழ் போதனா வைத்தியசாலையில் அனுமதிக்கப்பட்டிருக்கும் யாழ். மயிலங்காடு ஏழாலை ஸ்ரீ முருகன் வித்தியாசாலை மாணவர்களை நேற்று (19.03.2015) தமிழ் தேசியக் கூட்டமைப்பின் பாராளுமன்ற உறுப்பினர் சுரேஸ் பிரேமச்சந்திரன், தமிழ் தேசியக் கூட்டமைப்பின் வட மாகாணசபை உறுப்பினர்களான தர்மலிங்கம் சித்தார்த்தன் மற்றும் பா.கஜதீபன் ஆகியோர் சென்று பார்வையிட்டதுடன், பாதிக்கப்பட்ட மாணவர்களின் பெற்றோர் மற்றும் பாடசாலையின் ஆசிரியர்களுடனும், வைத்திய அதிகாரிகளுடனும் கலந்துரையாடியும் உள்ளனர். இதேவேளை மேற்படி ஏழாலை ஸ்ரீமுருகன் வித்தியாசாலையில் உள்ள மாணவர்களின் குடிநீர்த் தாங்கியில் நஞ்சு கலந்தமையைக் கண்டித்தும், இதனுடன் தொடர்புடைய விசமிகளை உடன் கைதுசெய்;யக் கோரியும் இன்றுபகல் மாபெரும் கண்டனப் பேரணி ஒன்று இடம்பெற்றமை குறிப்பிடத்தக்கது.
யாழ் மயிலங்காடு ஏழாலை ஸ்ரீமுருகன் வித்தியாசாலையில் உள்ள மாணவர்களின் குடிநீர்த் தாங்கியில் நஞ்சு கலந்தமையைக் கண்டித்தும் இதனுடன் தொடர்புடைய விசமிகளைக் கைது செய்யக் கோரியும் இன்றுபகல் மாபெரும் கண்டனப் பேரணி ஒன்று இடம்பெற்றது. தூய நீருக்கான செயலணியின் ஏற்பாட்டில் இந்த கண்டன ஆர்ப்பாட்டம் நடைபெற்றது. இந்த கண்டனப் பேரணியானது மயிலங்காடு ஏழாலை ஸ்ரீ முருகன் சனசமூக நிலையத்தில் ஆரம்பமாகி சுன்னாகம் புன்னாலைக்கட்டுவன் வீதி வழியாக சுன்னாகம் நகரத்தை அடைந்தது. இந்த ஆர்ப்பாட்ட ஊர்வலத்தில் பாடசாலை மாணவர்கள் பெற்றோர்கள், பிரதேச மக்கள், பொது அமைப்புக்களின் பிரதிநிதிகள் பல்கலைக்கழக மாணவர்கள், வட மாகாண சபை உறுப்பினர்களான தர்மலிங்கம் சித்தார்த்தன் பா.கஜதீபன் வலி தெற்கு பிரதேச சபைத் தலைவர் தி. பிரகாஸ் எதிர்க்கட்சி உறுப்பினர் அரிகரன் மற்றும் உறுப்பினர்கள், தமிழ் தேசிய மக்கள் முன்னணியின் செயலர் கஜேந்திரன் இடதுசாரி கட்சிகளைச் சேர்ந்த செந்திவேல் தமிழ் அழகன் எனப் பலரும் கலந்து கொண்டிருந்தனர். ஆர்ப்பாட்ட ஊர்வலத்தில் கலந்துகொண்டவர்கள், மாணவர்களுக்கு எதிரான இந்நடவடிக்கைக்கு மத்திய அரசு உடனடியாக நடவடிக்கை எடுக்க வேண்டும். இதனுடன் தொடர்புடைய விசமிகளை உடன் கைதுசெய்ய வேண்டும். இந்த செயலானது பாடசாலைப் பிள்ளைகளுக்கெதிரான ஒரு மிகப்பெரிய தீய செயலாகும். எனவே விசமிகளை உடனடியாக கைதுசெய்வதற்கு முழுமையான நடவடி;கை எடுக்க வேண்டும் என கோசமெழுப்பியதுடன், நன்னீரில் நஞ்சு கலந்த நயவஞ்சகனை கண்டுப்பிடி போன்ற பல்வேறு கோசங்கள் அடங்கிய பதாதைகளையும் தாங்கி இருந்தமை இங்கு குறிப்பிடக்கூடியது.
உயர்பாதுகாப்பு வலயமாக இருந்த தமது நிலத்தினை பார்வையிடச் சென்ற வசாவிளான் கிழக்கு மக்கள் ஏமாற்றத்துடன் திரும்பி சென்றுள்ளனர். கடந்த 25 வருடகாலமாக உயர் பாதுகாப்பு வலயமாக இருந்த வசாவிளான் கிழக்கு மற்றும் பலாலி தெற்கு பிரதேசத்தில் உள்ள 197 ஏக்கர் காணி இன்றைய தினம் மக்கள் பார்வையிடுவதற்கு அனுமதிக்கப்படும் என கூறி 411 குடும்பத்தை அழைத்து சென்றிருந்தனர். ஆனால் விடுவிக்கப்படுவதாக கூறப்பட்ட குறிப்பிட்ட பிரதேசத்தில் 75 வீதத்திற்கும் அதிகமான பிரதேசம் விடுவிக்கப்படாமல் இராணுவத்தினரால் மக்கள் தடுத்து நிறுத்தப்பட்டனர். இன்றைய தினம் தோலகட்டி, வடமுனை, தென்முனை மற்றும் ஒட்டகப்புலம் எனும் பிரதேசம் முற்றாக விடுவிக்கப்படும் என அறிவிக்கப்பட்டு இருந்தது. ஆனால் ஒட்டகப்புலத்தில் ஒரு பகுதியே மக்கள் பார்வையிட அனுமதிக்கப்பட்டது, ஏனைய பிரதேசம் அனுமதிக்கப்படவில்லை. இதனால் தமது சொந்த நிலங்களை 25 வருடத்திற்கு பின்னர் பார்வையிட ஆவலுடன் சென்ற மக்கள் ஏமாற்றத்துடன் திரும்பி சென்றனர். 
மட்டக்களப்பு வாழைச்சேனை கடதாசி ஆலையில் கடந்த 5 நாட்களுக்காக உணவுத்தவிர்ப்பு போராட்டம் இடம்பெற்று வருகிறது. கடந்த நான்கு மாதங்களாக தமக்கு வேதனம் தரப்படவில்லை என்று தெரிவித்து சுமார் 150 நிரந்தர பணியாளர்களும் 70 தற்காலிக பணியாளர்களும் இந்த போராட்டத்தில் ஈடுபட்டு வருகின்றனர் மட்டக்களப்பு ஓட்டமாவடி பாலத்துக்கு அருகில் இந்தப் போராட்டம் இடம்பெற்று வருகிறது இந்நிலையில் எதிர்வரும் 25ஆம் திகதியன்று தமக்குரிய வேதனம் வழங்கப்படும் என்று அதிகாரிகள் உறுதியளித்துள்ளனர் இதனையடுத்து 31 ஆம் திகதியன்று அமைச்சர் மட்ட பேச்சுவார்த்தை ஒன்று ஏற்பாடு செய்யப்பட்டுள்ளதாக போராட்டத்தில் ஈடுபட்டுள்ள பணியாளர்கள் தெரிவித்துள்ளனர் எனினும் தமக்கு வேதனம் வழங்கப்படும்வரை போராட்டத்தை விலக்கிக் கொள்ளப்போவதில்லை என்று அவர்கள் எச்சரித்துள்ளனர்
இலங்கையுடனான உறவுகளை வலுப்படுத்த எதிர்பார்த்துள்ளதாக வியட்நாம் தெரிவித்துள்ளது. வியட்நாம் தூதுவர் நேற்று ஜனாதிபதி மைத்திரிபால சிறிசேனவை சந்தித்தபோதே இவ்வாறு கூறியுள்ளார். இதன்போது இரு நாடுகளுக்கும் இடையிலான கல்வி, சுற்றுலா மற்றும் சமூக தொடர்புகளை மேலும் வலுப்படுத்துவது குறித்து கலந்துரையாடப்பட்டதாக, ஜனாதிபதி ஊடகப் பிரிவு கூறியுள்ளது. மேலும் இதன்போது வியட்நாம் அரசாங்கத்தால் ஜனாதிபதிக்கு வாழ்த்துக்களும் தெரிவிக்கப்பட்டுள்ளது. அத்துடன் அந்த நாட்டுக்கு விஜயம் செய்யுமாறும் ஜனாதிபதி மைத்திரிபால சிறிசேனவிற்கு அழைப்பு விடுக்கப்பட்டுள்ளது.
இலங்கைத்தமிழர் ஒருவரை நாடுகடத்தும் திட்டத்தை பிரித்தானிய நீதிமன்றம் இறுதி நேரத்தில் தடை செய்துள்ளது. பிரித்தானியாவின் செனல் 4 ஊடகம் இதனைத் தெரிவித்துள்ளது. 36வயதான கண்ணன் காளிமுத்து என்பவர் புலிகளில் காவற்துறை அதிகாரியாக செயற்பட்டதாகவும், இலங்கையில் அச்சுறுத்தலை சந்தித்ததை அடுத்து அவர் பிரித்தானியாவுக்கு தப்பி சென்றதாகவும் கூறப்படுகிறது. ஏற்கனவே தமது நாடு கடத்தலுக்கு எதிர்ப்பு தெரிவித்து அவர் பிரித்தானியாவில் இரு தடவைகள் தற்கொலை முயற்சியில் ஈடுபட்டார். எனினும் ஹீத்ரோவுக்கு அருகில் உள்ள கோன்ப்ரூக் அகதி முகாமில் அதி உச்ச கண்காணிப்பின் கீழ் தடுத்து வைக்கப்பட்டிருந்த நிலையில், நேற்று அவர் நாடு கடத்தப்படவிருந்தார். எனினும் அவரின் மனநிலை கருதி அவரை நாடுகடத்தக் கூடாது என அவரது சட்டத்தரணியால் தாக்கல் செய்யப்பட்ட மனு ஒன்றின் அடிப்படையில், இங்கிலாந்தின் நீதிமன்றம் அவரது நாடு கடத்தல்; திட்டத்தை தற்காலிகமாக இடைநிறுத்தியிருப்பது இங்கு குறிப்பிடத்தக்கது.
அவுஸ்திரேலிய அரசாங்கத்தினால் இலங்கை அகதிகள் தடுத்து வைக்கப்பட்டுள்ள நவுறுதீவின் அகதி முகாமில் பாரிய ஆர்ப்பாட்டம் ஒன்று நடத்தப்பட்டுள்ளது. கடந்த சில தினங்களுக்கு முன்னர் இந்த முகாமின் அதிகாரிகள், நவுறுதீவின் குடிமக்கள் மற்றும் அகதிகளுக்கு இடையில் முறுகல் நிலை ஒன்று உருவாகி இருந்தது. இதன்போது அகதிகள் சிலர்மீது தாக்குதல் நடத்தப்பட்டதாகவும் அதில் சிலர் கடும் காயங்களுக்கு உள்ளானதாகவும் தெரிவிக்கப்பட்டுள்ளது. இதற்கு எதிர்ப்பு தெரிவித்தே இந்த ஆர்ப்பாட்டம் நடத்தப்பட்டுள்ளதாக தெரியவருகின்றது.
காணாமற் போனோர் தொடர்பான முறைப்பாடுகளை விசாரணை செய்யும் ஜனாதிபதி ஆணைக்குழுவின் அம்பாறை மாவட்டத்திற்கான அமர்வு ஏப்ரல் முதல் வாரத்தில் இடம்பெறவுள்ளது. ஏப்ரல் 6ஆம், 7ஆம், 8ஆம் மற்றும் 9ஆம் திகதிகளில் அக்கரைப்பற்று மற்றும் கல்முனை பிரதேச செயலகங்களில் சாட்சி விசாரணைகள் முன்னெடுக்கப்படவுள்ளதாக ஆணைக்குழுவின் செயலாளர் எச். டபிள்யூ. குணதாச தெரிவிக்கின்றார். சாட்சி விசாரணைகள் நடைபெறவுள்ள நான்கு நாட்களிலும் நாளொன்றுக்கு சுமார் 100 பேர் வீதம் விசாரணைக்கு உட்படுத்தப்படுவார்கள் எனவும் ஆணைக்குழுவின் செயலாளர் கூறியுள்ளார். இதனை முன்னிட்டு அம்பாறை மாவட்ட செயலாளர் உள்ளிட்ட பிரதேச செயலாளர்கள் மற்றும் கிராம உத்தியோகத்தர்களை சந்தித்து ஆணைக்குழுவின் அமர்வுகளை ஒழுங்குபடுத்தும் நடவடிக்கைகள் குறித்து கலந்துரையாடவுள்ளதாக எச்.டபிள்யூ. குணதாச குறிப்பிட்டுள்ளார்.
வவுனியா நெளுக்குளம் கலைமகள் மகா வித்தியாலய ஆரம்ப பாடசாலையின் வருடாந்த இல்ல மெய்வல்லுனர் திறனாய்வு போட்டி இன்று செவ்வாய்க்கிழமை (17.03) பிற்பகல் 02.00 மணியளவில் வித்தியாலய அதிபர் திரு.சு.அமிர்தலிங்கம் அவர்களின் தலைமையில் சிறப்பாக நடைபெற்றது.
இலங்கையின் தேசிய கீதம் சிங்கள மொழியில் மாத்திரமே பாடப்பட வேண்டும் என்று முன்னைய அரசாங்கத்தினால் விதிக்கப்பட்டிருந்த கட்டுப்பாட்டை நீக்குவதற்குப் புதிய ஜனாதிபதி மைத்திரிபால சிறிசேன உறுதியளித்துள்ளதாக ஜனநாயக மக்கள் முன்னணியின் தலைவர் மனோ கணேசன் தெரிவித்திருக்கின்றார்.
கொழும்பில் அமைந்துள்ள சிறிலங்கா முஸ்லிம் காங்கிரஸ் தலைவர் ரவூப் ஹக்கீமின் இல்லத்தில் 17.03.15 இக்கலந்துரையாடல் இடம்பெற்றுள்ளது. இதன்போது தேர்தல் முறைமை மாற்றம் தொடர்பாக சிறுகட்சிகளின் நிலைப்பாடுகள், எதிர்கொள்ளும் சவால்கள், தேர்தல் மாற்றம் தொடர்பில் சிறுகட்சிகள் எடுக்கக் கூடிய இறுதித்தீர்மானங்கள் குறித்தும் விரிவாக கலந்துரையாடப்பட்டது.
துனிஷியாவின் தலைநகர் ட்யுனீஷ் நகரில் உள்ள நாடாளுமன்றத்திற்கு அருகில் அமைந்திருக்கும் பார்தோ அருங்காட்சியகத்தில் துப்பாக்கிதாரிகள் நடத்திய தாக்குதலில் குறைந்தது 21 பேர் கொல்லப்பட்டுள்ளனர் என்றும் அவர்களில் 17 பேர் வெளிநாட்டவர் எனவும் அந்த நாட்டு பிரதமர் தெரிவித்துள்ளார். 
தமிழீழ விடுதலை புலிகளுக்கு ஆதரவாக செயற்படுவதாக கூறி தடை செய்யப்பட்ட புலம்பெயர் தமிழர் அமைப்புக்கள் (டயஸ்போரா) மீதான தடைகள் குறித்து மீளாய்வு செய்யவேண்டும் என்று வெளிவிவகார அமைச்சர் மங்கள சமரவீர தெரிவித்துள்ளார். குறித்த அமைப்பிலுள்ள பலர், தமிழீழ விடுதலை புலிகளுக்கு ஆதரவளிக்கவில்லை என்று விசாரணைகளின் மூலம் தெரியவந்துள்ளதாகவும் அவர் கூறினார். இந்த அமைப்புக்களை தேசிய நல்லிணக்கத்துக்கு பயன்படுத்திக் கொள்ளமுடியும் என்று குறிப்பிட்ட அவர் இதிலுள்ள பலர், இலங்கைக்கு பெருமையைத் தேடி தந்த பல்துறை நிபுணர்களாகவும் கலை மற்றும் சட்டத்துறையில் நிபுணத்துவம் பெற்றவர்களாகவும் காணப்படுகின்றனர் என்று அவர் சுட்டிக்காட்டினார்.
கோடியக்கரைக்கு தென்கிழக்கே கடந்த பெப்ரவரி மாதம் 26ஆம் திகதி மீன்பிடித்துக்கொண்டிருந்த காரைக்கால் மற்றும் நாகப்பட்டினம் பகுதியை சேர்ந்த 86 மீனவர்களையும், இவர்களது 8 படகுகளையும் இலங்கை கடற்படையினர் சிறைபிடித்தனர். இவர்களை இரு பிரிவாக்கி வழக்குப் பதிவு செய்த இலங்கை கடற்படையினர், இலங்கைக்கு கொண்டு சென்று சிறையில் அடைத்தனர். இவர்களில் முதல்கட்டமாக 43 மீனவர்கள் நீதிமன்றத்தால் கடந்த சனிக்கிழமை விடுவிக்கப்பட்டனர். இரண்டாவது கட்டமாக எஞ்சிய நாகையை சேர்ந்த 21 பேரும், காரைக்காலை சேர்ந்த 22 பேரும் செவ்வாய்க்கிழமை விடுவிக்கப்பட்ட நிலையில், இந்திய கடலோரக் காவல்படையினர் புதன்கிழமை காலை காரைக்கால் துறைமுகத்துக்கு இவர்களை கப்பலில் அழைத்துசென்று கடலோரக் காவல்படை காரைக்கால் மைய கமாண்டன்ட் உதல்சிங், மீனவர்களிடம் விசாரணை நடத்தி அந்தந்த மாவட்ட மீன்வளத்துறை அதிகாரிகளிடம் ஒப்படைத்தார்.
இலங்கை வந்துள்ள சுவிஸ் நாட்டின் வெளியுறவு அமைச்சர் டிடியர் பேர்க்ஹோல்டர் யாழ்ப்பாணத்திற்கு விஜயம் செய்து அந்த நாட்டின் உதவியுடன் அமைக்கப்பட்டுள்ள வீட்டுத் திட்டம் ஒன்றை பயனாளிகளுக்குக் கையளித்ததன் பின்னர் வடமாகாண முதலமைச்சர் விக்னேஸ்வரனையும் சந்தித்துப் பேசியுள்ளார்.
தமிழ் தேசிய இளைஞர் கழகத்தின் ஆலோசகர்களில் ஒருவரான திரு.முத்தையா கண்ணதாசன் அவர்களின் செல்வப்புதல்வி அட்சயா அவர்களின் 16வது பிறந்ததினத்தை முன்னிட்டு தமிழ் தேசிய இளைஞர் கழகத்தினால் வலுவிழந்தோர் புனர்வாழ்வு நிறுவனத்தை (ORHAN) சேர்ந்த மாணவர்களுக்கு இன்று திங்கட்கிழமை (16.03) விசேட மதிய உணவு வழங்கப்பட்டது.