யாழ். கோண்டாவில் ஸ்ரீ அர்ப்புதநர்த்தன விநாயகர் சனசமூக நிலையம், குமரன் விளையாட்டுக் கழகம் என்பவற்றின் அழைப்பின்பேரில் சனசமூக நிலைய மண்டபத்தில் தமிழ் தேசியக் கூட்டமைப்பின் தேர்தல் பிரசாரக் கருத்தரங்கொன்று நடைபெற்றது. இன்றுமாலை 6மணியளவில் திரு. பௌசன் அவர்களின் தலைமையில் நடைபெற்ற இந்நிகழ்வின் ஆரம்ப நிகழ்வாக கோயிலில் விசேட பூஜைவழிபாடுகள் இடம்பெற்று, அதிதிகள் கௌரவித்து வரவேற்கப்பட்டு மங்கள விளக்கேற்றலுடன் கருத்தரங்கு ஆரம்பமானது. இந்நிகழ்வில் புளொட் தலைவரும், தமிழ் தேசியக் கூட்டமைப்பின் வட மாகாணசபை உறுப்பினரும், யாழ் மாவட்ட வேட்பாளருமான திரு. தர்மலிங்கம் சித்தார்த்தன், வட மாகாணசபை உறுப்பினர் திரு. பா.கஜதீபன், சமூக ஆர்வலர் திரு. கெங்காதரன் ஆகியோர் உரையாற்றினார்கள். இங்கு உரையாற்றிய திரு. தர்மலிங்கம் சித்தார்த்தன் அவர்கள், மிக முக்கியமான ஒரு காலகட்டத்திலேயே இந்தத் தேர்தல் நடைபெறுகின்றது. ஏனென்றால் இந்த தேர்தலிலே தமிழ் மக்களுடைய ஒற்றுமையின் பலத்தைக் காட்டவேண்டிய ஒரு காலகட்டம் இதுவாகும். ஆகவே நாங்கள் ஒற்றுமையுடன் செயற்பட வேண்டும். தெற்கைப் பொறுத்தமட்டில் ஒரு மிகப்பெரிய அரசியல் குழப்பகரமான நிலைமையில் இருக்கின்றது.

Read more

வீரமக்கள் தின நிகழ்வுகள்-

தமிழீழ மக்கள் விடுதலைக் கழகம் (புளொட்) ஆண்டுதோறும் அனுஷ்டித்துவரும் வீரமக்கள் தினம் இன்று 13ம் திகதிமுதல் 16ம் திகதி வரையிலுமான நான்கு நாட்கள் அனுஸ்டிக்கப்படுகின்றது. தமிழர் விடுதலைக் கூட்டணியின் தலைவர் அப்பாப்பிள்ளை அமிர்தலிங்கம் அவர்கள் கொல்லப்பட்ட தினமான ஜூலை 13ம் திகதிமுதல் புளொட் செயலதிபர் கதிர்காமர் உமாமகேஸ்வரன் அவர்கள் படுகொலை செய்யப்பட்ட தினமான ஜூலை 16ம் திகதி வரையிலான காலப்பகுதியை வீரமக்கள் தினமாக புளொட் அமைப்பு பிரகடனப்படுத்தி ஆண்டுதோறும் அனுஷ்டித்து வருகின்றது. தமிழ் மக்களின் விடுதலைப் போராட்டத்தில் தம் இன்னுயிரை ஈந்த கழகக் கண்மணிகள், தலைவர்கள், அனைத்துப் போராளிகள் மற்றும் பொதுமக்கள் அனைவரையும் நினைவுகூர்ந்து அஞ்சலி செலுத்தும் வகையில் வீரமக்கள் தினம் அனுஷ்டிக்கப்பட்டு வருகின்றது. வீரமக்கள் தினத்தின் முதலாம் நாளான இன்று வவுனியா கோவில்குளத்தில் அமைந்துள்ள புளொட் செயலதிபர் உமாமகேஸ்வரன் அவர்களின் நினைவில்லத்தில் நினைவுச்சுடர் ஏற்றல், மௌன அஞ்சலி மற்றும் மலராஞ்சலியுடன் 26ஆவது வீரமக்கள் தின நிகழ்வுகள் ஆரம்பமாகியுள்ளன. வீரமக்கள் தினத்தின் இறுதிநாளான எதிர்வரும் 16ம்திகதி செயலதிபர் உமாமகேசுவரன் நினைவில்லத்தில் மலராஞ்சலி மற்றும் மௌன அஞ்சலி நிகழ்வுகள் இடம்பெறுவதுடன் அஞ்சலிக் கூட்டமும் இடம்பெறவுள்ளது.

வவுனியாவில் நடைபெற்ற 26ஆவது வீரமக்கள் தின ஆரம்ப நிகழ்வுகள்-(படங்கள் இணைப்பு)

தமிழீழ மக்கள் விடுதலைக் கழகத்தின்(புளொட்) 26ஆவது வீரமக்கள் தினத்தின் ஆரம்ப அஞ்சலி நிகழ்வுகள் இன்று (13.07.2015) கழகத்தின் தோழர்களால் வவுனியா கோவில்குளத்தில் அமைந்துள்ள அமரர் தோழர் க.உமாமகேஸ்வரன் இல்லத்தில் முன்னெடுக்கப்பட்டது. ஆரம்ப நிகழ்வாக கழகக்(புளொட்) கொடி கழகத்தின் முக்கியஸ்தரும் வவுனியா நகரசபையின் முன்னாள் உபநகர பிதாவுமாகிய திரு க.சந்திரகுலசிங்கம்(மோகன்) அவர்களினால் அரைக்கம்பத்தில் பறக்கவிடப்பட்டு அஞ்சலி நிகழ்வுகள் ஆரம்பமானது.

அதனைத் தொடர்ந்து தமிழர் விடுதலைக் கூட்டணியின் செயலதிபர் அமரர் அ.அமிர்தலிங்கம் அவர்கள் மற்றும் செயலதிபர் அமரர் தோழர் உமாமகேஸ்வரன் ஆகியோரது திருவுருவப் படங்களுக்கு முன்னாள் பாராளுமன்ற உறுப்பினர் திரு. வை.பாலச்சந்திரன், வட மாகாணசபை உறுப்பினர்களான திரு. சிவநேசன் (பவன்), திரு. ஜி.ரி.லிங்கநாதன் ஆகியோரால் மலர்மாலைகள் அணிவிக்கப்பட்டு தொடர்ந்து கழகத்தின் தோழர்களால் மலரஞ்சலி மற்றும் மௌன அஞ்சலி செலுத்தப்பட்டது. இவ் ஆரம்ப நிகழ்வில் நிசாந்தன், ரவி, சிவா, ஜஸ்மின், பார்த்தீபன் ஆகிய கழகத் தோழர்களும் பிரதீபன், நிகேதன், சுரேஸ் உள்ளிட்ட ஆதரவாளர்களும் கலந்துகொண்டிருந்தனர். 

Read more

மலேசியாவில் நினைவுகூரப்பட்ட 26ஆவது வீரமக்கள் தினம்-(படங்கள் இணைப்பு)

புளொட்டின் 26ஆவது வீரமக்கள் தினம் மலேசியா டமாங்கிறா டமாய் என்னும் பகுதியில் இன்றையதினம் நினைவுகூரப்பட்டது. கழகத் தோழர்களான சிவபாலன் மற்றும் ரியாந்தன் ஆகியோரது தலைமையில் இந்நிகழ்வுகள் ஆரம்பமாகி நடைபெற்றன. இதன்போது வீரமக்களின் உருவப்படங்கள் வைக்கப்பட்டு நினைவுச்சுடர் ஏற்றப்பட்ட மலரஞ்சலி மற்றும் மௌன அஞ்சலி என்பன இடம்பெற்றன. இந்நினைவுதின நிகழ்வில் கழகத் தோழர்கள் மற்றும் ஆதரவாளர்களும் கலந்து கொண்டு அஞ்சலி செலுத்தினர்.

Read more

மக்களின் வாக்குகளை சிதறடிப்பதே தமிழ் தேசியத்திற்கு முரணான சக்திகளின் பிரதான நோக்கம்-புளொட் தலைவர் த.சித்தார்த்தன்-

பொதுத் தேர்தலில் தமிழ் தேசியத்திற்கு முரணான சக்திகள் களமிறக்கப்பட்டுள்ளதாக தெரிவித்த புளொட் தலைவர் தர்மலிங்கம் சித்தார்த்தன், அவை எமது வாக்குகளை சிதறடிப்பதையே பிரதான நோக்கமாகக் கொண்டிருப்பதாகவும் குறிப்பிட்டார்.

பொதுத் தேர்தல் தொடர்பாக கருத்து வெளியிடுகையிலேயே, மேற்கண்டவாறு அவர் தெரிவித்தார். அவர் இது தொடர்பில் மேலும் தெரிவிக்கையில்,

நான் மக்களோடு மக்களாக இருப்பவன் என்ற அடிப்படையில் தமிழ் தேசியக் கூட்டமைப்பு தொடர்பாக சில மனக்குறைகளை என்னிடத்தில் அவர்கள் முன்வைக்கின்றார்கள். எனினும் தமிழ் மக்களின் ஒற்றுமை என்பது தற்போதைய காலத்தில் மிகமிக முக்கியமானது என்பதையும், அதன் அவசியத்தையும் அவர்கள் உணர்ந்தவர்களாக இருக்கின்றார்கள். அதனடிப்படையில் கூட்டமைப்பு தொடர்பாக அவர்கள் கொண்டிருக்கும் சிறுசிறு குறைகளுக்கு அப்பால் எமது கூட்டமைப்பை ஜனநாயக ரீதியாக இத் தேர்தலில் பலப்படுத்த வேண்டும் என்ற எண்ணமே பெருவாரியானவர்களிடத்தில் காணப்படுகின்றமையை வெளிப்படையாகவே அறியக்கூடியதாக உள்ளது.

Read more